Thursday, 30 December 2010

Ing Casalang

Matuling iang tulus ing caiang caianacan—
macabaiutuc
mialunan
qng cadaiat-malatan
labas-labasa’t balic-balican ning aslag ning caugtuan.

Mengalasac no ngan
ding babatiauan nang pampang
quing alang patugut a gulisac ning duldul
at caring maplas a tampaling ning bubulus a uran
ala . . . ala nang mitagan
caring bunga ning saculan a timna’ na’t pipagalan

at caring pala, sarul-gamat at piruya nang tatalanan,
ngening ing isip na’t sicanan icua na nang quesiliman,
ing saculan ning paninap babalican ne’t gagambulan
pasibaiu nong tatanam ding limbug a taguimpan
guilid ding mangalalam a paligui ning dine’t capagsisian
a maguing cutcutang tatanguisan na’t pagpaldasan,
sisilipan, caring alac a alducan at copitang pamalbalan

Ing pipiling a lunus -- ia cabud manaquit qng catutuan,
ing sasalangsang . . .o mecad, caiabe nang maniambitan
a pasibaiu lang musbung at saguiwa
ring lanat a tangque ning caiang taguimpan
caiabe nang manigapu, a misan ia pang calunusan
ing caladuang linubas na’t delise
ning maplas a lisyun ning napun a mesaiang

--calungcutan—oh! calungcutan—gamat ne ning panaun
a sasamsam at guiguisan – macapampan a casalang--
quing bie nang mamirapal quing cutcutan

tulus iang tutusuc quing daraiang pilubluban

Saturday, 18 December 2010

Genesis 22:2

king bunduk ning Gerizim – makatuklu king Moriah-
karin ya minukyat ban silaba’ neng
anting mabanglung daun
ing anak nang bugtung—
tatangi at pakamalan—
binie na na kaya
o ba’t ngeni, pasibayu neng kukunan?

Wa, kaniting pinandit
nung kitnan ne man
ning malak-malak nang anak
nung bakit dapat na iting gawan,
linubas na na ning mamintung Ibpa
ing anggang kapikakunuan
pablasang balu na
karing maki-matibe kasalpantayanan
malalaso ngan ing anggang kutang;
alang dapat mitas kayagna’ ning pataram
nune ring pakumbabang dalit:
Y Ka mu O’ Diyos, Y Ka kabud ing dapat kung tukyan!

pablasang gagap na
ding maki-dalise pilubluban
yla ring manakit karing pawaga ning Miglalang:--

aliwa mu reng Isaac
ing buri nang tanggapan;
deta mu namang mengalili
karing liku-likung dalan.
ban abitasa rang
ing tupang pelit nang Abraham
‘ya naman ing korderong
mipaku
minaku
king sala ning sikluban





****published in emanilapoetry

Friday, 10 December 2010

Pamanlipat

mayayaninag ya
karing katas-katawang miyayanib,
karing balang sikdu, kimbe at indayug
da ring miyuyugpungang awakan
ing pami-paitas ruruk
a pagnasan tang puntan

babagsen te ing kaganapan;
aplus-aplusan ing kaselanan
ning alingapngap at nasa--
ning pamanlaut
king mangisnawang gabun

mangulabe ka ta
king galgal ning yatu
balu ta la man ding makasawan
a yuyu ning alun,
ding gaspang da ring batu
king kangatbang pampang,
manalangin kata pa muring
atabnuan te ing ligaya—
kagatpanapunang makawangis
king paraisung miyalunan.



*** also published in ek!/versilog

Sunday, 5 December 2010

Ding Mitalakad Karing Kubul

Likwan da la ring mamartikulad ding bale rang tuknangan.
Karing pilapil at tarundun-- a angganan ning pisasabyan--
telakad da la ring kubul ning saingsing at katuliran.
Linucluc la’t nginulangul--anti ra mong paglamayan
ing makapase atbu a pilan-pulung banwa rang tenam
king mengabtak a asikan

alang mayumu . . .
daya
ing kinatas a upa ning sabla rang kapagalan

Ding melakwan a pibale-bale
taguimpan lang meguing bula
lugu-lugung tatakbang
payuli king kawakasan

Mengaring pamanuli
ning dinaung-panaun,
ning sikanang inampang,
a mibata king labul ning angin at bulus ning uran,
mipnu mang pag-inakit, mekad,
taganang makanyan, babalik ngan ing sabla
king sepupunan ning gabun a pibatan

Lawan mu la, oh! kakung balayan!
nung makananung tatanggapan de ngeni
ing karelang pangalupig. Payapa la pilubluban
ding ortelanung meguisan na sikanan.
E no bisang gulisak man!

Lawan mu la, oh! kakung balayan
nung makananung adwang gamat,
mitmung tula nong babalik king matris ning gabun
ding anak nang mengapirat a katawan—
busbus a salu keni
buntuk a sinilip ning punglu keta
butul a linual king bitis karin…

Anting angin a sinawa nang lalabul karing biga ning kabengian,
ding telakad dang kubul, mipapayid at tutuklip lang kapagnasan

lastag at mepata katawan
mengalupig katuliran—

makanyan lang mumuli ding anak a bandi at alipan ning asikan


Tuesday, 9 November 2010

Karing Lugal A Pitabnuan

minetung neng alduk ning maynip a asbuk
bakasakaling alumud
ing mebangnas a wawa king merimlang kape --


a atlung oras na nang gugogo, saluk-salukan
ning pilak a kutsaritang

melyu na’t melingo
king kayli’t wanang durut ning kapigaganakan.

suswatan ne ning mibubwang lawe ing manaimik a dalig
pikukurus-pigagamus, kukutnan ne ning wanang bitis

ing kayling bitis: datang ya pa kaya?
e na akua mang makabulad ning bitis a kitnan
a magumpisa nang tatakbang - - paluwal.

nung misan, agyan ding lamesang kakabugan
o ring sasaldak at babasibas a luklukan
ala lang abibye kapakibatan

kutang at kutang mu rin
ing daratang

ing malalakwan
karing lugal a pitabnuan.




*****

also published in eK!/versilog

Tuesday, 26 October 2010

Makisalilung

Daratang ka
karing pinandit a enaku mamasa pa

Kakalawit mu la
king kakung tundun
king kakung awakan
ding makalipang a samu at amuyut
a magbalik karing mumungul a lagaslas
ning danum king dutsang pipandiluan;
karing sikdu ning kasabikang
pilit ku mang sasalikut
king pamiduku't pamipaling
ning lupa kayli't wanan,
bubulalag da rin
ding eratikung pildis
at pihit ning pamikelangan.
Sukal lub
a banayad dang lalasawan ding langitngit
ning kama
ning mangisnawang dalig.

King silid a iti ning sablang panalala
paulit-ulit, iyabut mo kanaku
ding kekang pasalubung:
pengili at pipitna-pitnang pamipalino
maka-lata, kupit-kupit a pamanenaya
maka-boting uma – padaplis, panako, sakildap
makasuput a Comusta na
mamirapal at alang-kasigurwang
mibalik ku keng Sabadu
tingi-tinging lugud a kekang lalakwan
karing kislut-gusut ning ulas a sepinan.

Daratang ka karing balang pinandit
a mapagal nakung manenaya
at kalupa ning sadya,
awni yako—
kakabug a salu
at mangataranta.

Friday, 15 October 2010

metung a dalit

E ye abalanan
ing kamulalung magtudturan

nung makapaluput ya man
king sanga nang santungan.

Paburen yeng manenaya
king atuktuk na at asagpang

Iwangis ya
karing balang silaba ning metung a pikudta

karing iyapse kataya—
banayad dapot kagyat at sakildap;

mamusbus lang panimanman
ding pangil nang mangataram.

Paburen ye, king taimik nang pamaglame.
King matiyaga nang pamanantabe

karing sampat a pamikatagun
ning makamandag a pamanapse.

Nung makananu yeng didinan katimawan
ing pamigulis karing larauan at anyu,

paburen yung pisanmetung na la
ning poesya ku ding tau ampo ring batu

Paburen yu ku.

Gugulis ku—
karit ampong masu—

sandatang pamutut
karing talikalang makapaluput.

Sunday, 10 October 2010

despedida

Pikakasaman mu ing pina-pinandit
a busina da ring saken
ing palipat-lipat a indredus
at sitsit da ring siping bale
ing gulisakan da
ring kayanakan a pasulapo buradul
babo ning bubungan

Mabubuluk ne talaga ing yatu—ing paliwanag cu
Mayayagnas ne ing bale tamu – ing pekibat mu
Iniang benging ita
migugulut teng pekirakpan ing tudtud.

Kilbit naku ning galingaldo;
e ku apagsaryan
ing bigla nang pangakayan
ning kama tang pitudturan.

Thursday, 7 October 2010

angganan

makatawit keng danggut
susukdan ke ing lapit ampo’ing lawut
ning bie at pangapatlud
keni
libutad ning bunduk—
a magtumayla
makiyagnan karing kurya
ring lalagitik a sanga’t palapa—
teterak
magtiririn
king pasyuk ning amian—
babo ning kayang bumbunan.

titiltil ne king ligaya ing kayang talampakan—
anti ya waring prinsipi —
manuyab ya ing bunduk
karing aplus
uma
pangisnawa
ning dadalise ilug

bengi-bengi
pakiramdaman ku
ing tatangis a lagaslas ning ilug.
kayagnan da ring salpuk ning alun king pampang
a kakung tatalakaran, sasagese ing kirut
sasalangi ing salpak
karing pintig na ning pulsung
mumuling mangayna dapuat makapapangaklak
a langitngit king pasbul. banayad a kaluskus
king banyu
kusina
la mesang pipanganan,

misasaldak la king pagkeran ding pangisnawang
miyuyubug king bilug-bilugan a yasuk
ning sigarilyung makiuma keng kisami—
maglambis at kakaul king yeru ning bubungan.

ala nang ulaga pa ing kirut.

maguing ing nanumang ayampang
a tula ning ilug –nung atin man
agyang ding balang pinandit ning pamipalsintang
misang minaplus at sinalangi king pakuyad kung bie.

ala nang migit a mayulaga
nune ing makasandal king dalig a pamanenaya . . .

mibayit ku king makanining paralan
keni ku makayampang:

king pamamulut karing sampagang mayayagtal
king ardin
ning pamikawani’t kamatayan.

Wednesday, 29 September 2010

King Ume Mate At Karing Makamate

Patikdon de ring laureadu
ing kalalangan at amanu

Maglitanya la ring dila:
Indu! Indu! Mibangun ko pu! —

màsakit ya iti
at e na akua mang makabulad.

Ulwan de at sasagipan
payasukan
karing mamerang galal
makarimang pamanyamsam
at miyayaliwang kabalbalan.

Ing lugud
makanyan yang mipipildis kabaldugan.
E ku na pagtakan. E ta na pagtakan.

E na dapat pagmulalan
nu nukarin papunta ing pamanyayang
karing nanumang mitatagan a sikanan--
kamatayan! kamatayan!

Ala yang keliwan
king pirapal, alang patugut a tulandung
at pamikuldas ning danum—
ibat king kalbung kabundukan, gagapang
at milulumud king gabun ning kapatagan
agyang maluat nang tinuknang ing uran

Ala yang keliwan
king lablab ning api keng karelang pagkeran
a era atakasan— kakaluku dapot e magigisan

ing titis a baya
at lipatung tatalsik,
kikislap a patutu
ning karelang kamalyan--

luluklukan do reti
at e ro buring lakwan.

Lipang-lipang a pamaninap
libutad ning kaugtuan.

Tuesday, 28 September 2010

Pinirat A Bulung King Kartograpiya Ning Kataimikan

Ing Pisasabyan magsamula ya
king kalaraman. At ding balang metung
a mamagpang, daramdaman de ing pamikawani
nung makananu yang mikakawani, mapipitna kalibudtan
ing metung a pulu ning yelu – gagato libutad ning kadayat-malatan—

pulu ne ning dimlang antimong alang tataglayan
a nanumang sikanan. Ing kayang kararasan
anti na na waring panibala king upaya ning kalikasan

Ing Kawatasan – makanyan ya naman
kakatmuan deng kalaraman
pilit deng pipiratan at pipitnan
king pisasabyang gagapus da’t babakuran karing batas,
tayidtayidsarisaringkata(k)tala(k)karangmoralpamagbusal. Sala-
salabid a balamu lubid, makatisud a kapanwalan

Dapuat ing Kawatasan
e ya kapilan man Pisasabyan

Mate la’t mikutkut ding Pisasabyan
mako la’t magbalik
ding anggang minagpang
dapuat ing Kawatasan
lalang ya iting katmuan mu mang kalaraman
apirat mu man king papil nang pisulatan
nung makasanib ne’t mamagus,
dumurut ya’t talete mengaring daya
karing uyat at panimanman; pablasang ala . . .

ala yang kikilalanan
a tayidtayidsarisaringkata(k)tala(k)karangmoralpamagbusal,

e ne sakup
ning pamikawani’t kamatayan
ing kalalangan.





***********

Monday, 27 September 2010

ing mangudtang cauatasan

ing mangudtang cauatasan
kuting iang manalucquiat qng platerang sampanan

carin, pilit nong paquiabutan ding macasapunggul
a bulaclac — quilub ning plorerang pilulanan

mililiuas nong cacalauat, macalale
ding bitis na kayli’t uanan

cabang ding makapatauling aduang bitis
macatucud no man

ing mangudtang cauatasan,
tatacut ia ma’t mamiquelangan,

kuting iang magpumilit misampa; ume ia’t ume ia
micalabius ia man, manacbag at dugpa ia man

quing timbang mipnung danum
a macasalud quing lalam.


------------

Sunday, 26 September 2010

quing dine ra

licas da la reng macapacat
a bulung caring carelang malingmingan—
malingmingang alang laman

alang cauatasan
e la mecalalang nanuman
ding melanging laurel ning caiabangan—
mengaring sucal
a mengatmu quing balun ning caisipan

silaban do reti
at megumpisa lang sinulat.

ding nimpa ampong ada
dimdam cong dinalit
at migtumaila.

macaguising no ring macudta.





-------

also published in eK!/versilog

Beluan *

Beluan*


ay! makatua’t pengari

maki-pasari

karing lijim—

mitaid-taid, mituki-tuki

karing pemakud a bawal

pamagbusal

ikaming anak yu

gewa yu keng kawal

ban ngayu mitulid

kitkut ye karing litid

ing dalan a matulid

para king ikakayap

ning pangatau mi’t kaladua

ngayu, para king ikasaplala

at bukas a sagana

ning balang metung

dapua’t makananu keng sumulung

nung mabangnas ya pa king asan

ing babatiawan ming napun?


ay, makatua’t pengari

patangal banal

karing peyalben

pupugaya’t papalakpakan

ding siping bale,

kamag-anak,

kaluguran,

at ning demonyu

mismu.


ay! makatua’t pengari

kapilan ko pa mipakde

kapilan yu pa abitasang

e yu neman tatalanan

ing susi ning kabanalan?


kapilan yu pa ayamin

ing lepastanganan yu kami

ikeng sarili yung anak?


ay! pengari’t makatua

king keraklan da

ring kekong lijim

ala na keng sukat dapukanan

lalapo’t mumugse

buluk lang sasalingalngal


Ikayung sadyang tatalangan

karing gamat pipagmanuan

Indu, Ibpa

O’t nanung milyari

king bie tamung alang kalma?


bakit! indu mi at ibpa

ot kakatmuan yula

ring kekeng isip

king makalumud a lua?

-----------------------------

* Capabaluan: Ing poesya inangu ne at linikas ning talasulat a Oliver Carlos ibat keng poesyang Tagalug a maki-pamagat a “Alam” (ene pu balu nung ninu ing misulat, makanyan man babie ne pu ing mayap a puge at sampat a kapasalamatan). King pamilikas keng Amanung Sisuan, digdagan at elilan la ring mapilan a diwa at kataya ban manayun keng tema at paksang buri nang ipasiuala ning milikas.


** also published in eK!/versilog

quing benging calupa na niti *

QUING BENGING CALUPA NA NITI*
(paindispu cang Pablo Neruda)


quing benging calupa na niti, aiapse cu la, caring letra
ding libung palmura

igulisac, alimbaua, "ing bengi, quisut ne ning calaraman
at licas de puri ring daiucduc ing cacung lalauigan,
pemirat de imalan ing literatura na't calinangan"

manampaling ia qng mua na ing angin, dudura ia ing banua
quing sucal nang lub.

quing benging calupa na niti, aiapse cu la, caring letra
ding libung palmura

"liguran que ing cacung bangsa at ing caiang calinangan, sana,
liguran nacu naman."

quing macacalat a dulum, daramdaman cu la
ring piping saingsing ning gabun a tibuan,

a pigmasabal cu
quing pali ning caugtuan. caring patac ning cauran.
liguran nacu, liguran quea naman; ninu uari ing e linugud
quing Bangsang Capampangan, liuas caring mapilan

libutad niting cabengian, aiapse cu la, ua,
aiapse cu la ding libung palmura

iguliac: delusungan de at pipasa-pasang quisut
ing cacung bangsa,
ing literatura na, ing calinangan na,
dening atiu quing poder at maqui-upaia;

daramdaman cu la ring macapangaclac a siuala,
miguit a calunus-lunus; cabang lalbug ing gabun
quing lua da ring maluca—a ngueni macagapus
sacal-sacal ding puliticung sasapad quing casaquiman
libutad ning pamagbalugbug-cauali't capabaian
da ring talasulat–paiaus pantas—
a mipapate't mitutultulan quing cabaiaran-pagal,
coronang laurel at galal

cupal da! querat ning inda rang memanaco't mig-imbut
at quing amanu cu't calinangan migpalbug!
tacnaida rang mangalaram, mapamirait at ambug!

macanian na uari? quing metu suluc ating managulele.
mabilug a balaian: danup, tacut, quealang marine?

panintunan cu la ring mitatagan pang macasaup
imbut cu ing maquianib at maquisanmetung
ban magbalicuas, lumaban at tumutul

bengi iang calupa na niti
ing bengi da ring quecatang ninunu
ning liping matenacan at e mamisali quing tutu
iacu, ica, itamu ngan, meguisan ta na capanupaian.

isacuil ta na la, quing laguiu da ring melugami
ding lider tamung mapagcunuari.
ing sistema rang tiuali

nung sasamsaman da na ring barag at linta
ing anggang iaman at upaia
Ing bangsang quinatmu na—itamu ita—
dapat ta nang miguising at mag-alsa

ban ibat quing burac a quecatang pipagqueran,
mibangun tamu at lumaban.
maluat na ing anti caniting pamagsamantala,
dapat ta nang mipacde at lumaia

uli'ng daramdaman tamu ing anggang quirut,
quing benging calupa na niti,
at masucal ta ngan a lub, magngitngit
quing calaraman at cabalbalang mitaid-taid

nung ia aguiang maplas ta man a mata
quing taimic tang gulisac at gaga
nguening bengi, malmura tamu at bumulad
ban caspac ning abac, ume tamung balicuas,
ibalic ta ia
ing quecatamung dignidad.


************


*Pauaga: Ing poesya inangu ne at linikas ning talasulat a Oliver Carlos ibat keng poesyang Tagalug a maki-pamagat a “Ngayong Gabi (ene pu balu nung ninu ing misulat, makanyan man babie ne pu ing mayap a puge at sampat a kapasalamatan). King pamilikas keng Amanung Sisuan, digdagan at elilan la ring mapilan a diwa at kataya ban manayun keng tema at paksang buri nang ipasiuala ning milikas.


*** also published in eK!/versilog

Wednesday, 22 September 2010

dalit ning poeta

gilid ning pisamban, manintun cung salita
quing capagnasan cung aquit que ing sala

queng dulum
mepagal na cung magpalipat-lipat
caring durungauan a pilit cung bubuclat

ala cu iatang queliuan quing pulubing ini
macasapad, macapalad
careng pasbul ning pisamban – careng pasbul-pilubluban

nung misan,
tatacap que ing uanan cung palad queng uanan kung balugbug
at cabang mamapse cung amanu,
macaramdam cung siualang balamu uari e canacu. e cu siguradu
nung ing siualang maniambitan, maniglo queng calumbaian,
siuala de reng aliua o cacu ia naman

poeta cung guguliac at maniauad pang dacal
cabang ing pulubing macasapad quing cacung arapan
lunus mu, ala neng aliua pang aduan.

susubsub que ing cacung lupa caring aduang palad
ban queta, misalicut la reng mata. carin mu man,
macatabnu lang capasnauan
quing anggang baiat a carelang quiquiacan

carin mu man, ding tau, e ra abitasang queti iatu
ala cu, nanumang lugal a pagqueran, pagpainauan
quing buntuc at isip cung managulele quing pagal.




-------------

Sunday, 19 September 2010

Diquil Quing Lugud

misteriu iang pilit paquiracpan
cuculung da caring palad ing caiang cabaldugan,
ngarang sasabi:

lugud la
ring sampagang agtalan, pitutungi
cucuintas caring batal,
sasabit caring cupia, cacaticat
caring gamat a mitatalanan

lugud ia
ing sagacgac ning tulang e sucat alarauan
pateracan da caring gamat – macapalad
manenaya careng bulung
a babalag ning angin ibat caring tanaman

lugud ia naman
ing tete mamituglung
caring labuad a picauani ning danuman,
ning panaun a dinalan.

api ia nung misan
cacalbit quing pago ibat cagulutan
salingalngal iang banglu ning micacunung pamanlapit,
pamagbalic ning miuale, ning e na paintunan at asajan--
lalasauan na la ring merimla’t mesias a alino
ning pisac a napung e na sa buring tagquilan at balicdan

labul iang sacdal dimla, maniupan
quing tabsing na ning pampang
a maging yelung pipigil, mililisia caring salpuc
ning mangataram a salitang susugat pilubluban

mapait lang tagulele quing gulut ning pasbul—
pilit pipinid dapot maquiramdam
caring macapangaclac a galaid da ring bitis
lalapit
paralumpung mamitacbang
ban pasibayu iang milantang ing telang pupulis
careng talampacang micasala’t mirinatan

tela iang quing sucal lub, milulucut
dapot e man bisang mamin qng catutuan,
tela ia namang macalantang at manaia gilid dalan
tataglus qng tucuran ning pusung
pilit mibubuclat . . .
ban pasibaiu mung panasaquitan.

macanian ia ing lugud.
macanian ia canu
ing dapat nang maging cabaldugan

quing calupa cung
ala nang quilala

ala nang buri pang quilalanan

nune ing lugud
caring cacung cauatasan.

Thursday, 16 September 2010

Pamicauani

Quing pangatuclip na ning catatauliang blusa
a pepalub na quing queyang maleta,
balu cu, mituclip na
ing nanupamang mitatagan nang pag-asa

Isipan cu
nung deng luang mamagus caring pisngi,
mamalebe’t sasalangi caring queyang labi,
casing-calat no caia ning mapinung asin a e cu sasaryang
abubud quing kape cung sasangcapan —
cabang mipnu quing casbu cu lang pag-umasdan
deng painggulut nang tacbang?

Quing tauling pinandit, iquit cu, nung macananu neng
pecalauan ing asul a tarangcahan---nu nocarin la macauquit
deng aduang lagyu quilub ning metung a pusu

Macabalag ya pago,
ing queyang maleta macalale neng gugulyutan.
Macapangaclac, ding bitis a gagalaid, asna la cabaiat –
palaut . . . palaut . . . tatacbang na la palaut.

Bucas a bucas,
alilan que ing disenyu at cule na ning tarangcahan;
Ilaco cu ne ita’ng metung a lagyung macauquit
quilub na ning pusu; bacbacan cu na ing melaun
a pintura at burahan cu ngan ing mecapal a calauang---
antimong pamamura - quening cacung caisipan -
caring mecapal a calauang ning queyang catacsilan








--------------

Sunday, 12 September 2010

dalit ning cauran

sanacan mung ding bulung ning cauran
aliua ren ding sangcan, ding punial a tutusuc
queng pusu mung magpaldas at mabibislac quing beiatan;
cuculdas la reti caring sanga ning caqueuan
ban queta mitacpan ing gabun,
micatmuan la ring abtac, mibusalan la ring pilatan
a lelangan ning capalsintang minuli quing quealan

ban abitasa mu
nung nu’anti caniaman ing matudtud
libutad ning manene nang iuiu ning amian,
ning banaiad dang daiti quing quecang salu’t canuan
ring mababalag a lunus da ring papasiuc a tanaman;

ban apiucul mu
nung macananung ding marapal nang pintig
ning quecang utac, babagal lang ditac-ditac;
at quing lamius dang terac quing quecang arapan
ban e mu na damdaman pa ing sablang pait at caplas

(macanian pin iata, nung pacaisipan aguiang ing guinu ning caligaian,
mecad tinanguis na na ngan, guisan na na ngan ing sablang pait
at caplas nang pupusanan— ban pane nang tula ing queang damdaman)

sanacan mu sana
ding bulung ning cauran,
ila ren ding sangcan,
ban atanggap ing pamicauani
ning caladua mu’t catauan,
calupa ding piaptas a tinalague quing palutan—
a macasadia nang lugusan at daran—
ume ca’t maglacbe paiapa, mapatlud inauang
alang pait
alang caplas—
alang nanumang daramdaman.




--------
September 2010

Tuesday, 7 September 2010

bilig

ibat quing tutulung alulud, sasacsacan na
ning durugpang danum-uran
ing gabun a sisyo, maniglo,
caring sugat a malalam a queyang pilalasan.

sacsac lang mangataram. tandus quing budning
cucutcut, tataglus quing salu nang sugatan
ning babaing mamatiauan qng auang

tulu ning lua – cambe ning tulu ning uran.
tatandusan ne ing maputla nang pisngi—
tutulandung, sasalangi quing gilgal nang labi.

lele ning bacuran,
dudurutan de ring lango at yamuk

ing anac a bilig quing sepupunan—
simsam ne bie at sepulyut.

Sunday, 5 September 2010

dalumat

kidkuran na ing mengabalag,
migsa-balikubak a abu
king anit,
batal ampong brasu. melakwan
mengaring palid keng sintidu
ing misteryung e ra atungkab
ding darayang kuku.

nung misan, dakal a kutang
a makagyu mung sisilipan
king boti
basu
laslas a pulsu.

Ba'lang Mamun Ya Ing Caleldo

Pagsalbatan cu
ing pangauala
ning dacal
at mangalagung bague.
Calupa na, alimbaua,
ning baiung palut a pale—
macacadcad qng asican,
gintung balabal
qng pago ning dalagang
ing pauas na qng canuan
at layit nang tatalanan,
paquislapan ne
ning maca-mulagat a yaldo

labul iang masiquid
ing anging jabagat
ban ipasiag na ing pangarunut,
pangabuluc na ning are—
a pasibaiung paiangkin
magbalic qng atyan ning gabun
qng paniatang ning cauran

Macapag-inayang . . .
alang baque,
ala metung mu man
ing manatili capilan man.



*****

also published in eK!/versilog

Thursday, 2 September 2010

Queng Cacung Paninap

maninap cu naman
calupa da reng aliua
paninap mu ing sabla
cusut quing mata
queng gusut a ulirat;
lingo pamangapcap
quing sasalatang asque na ning pisac

calupa nabengi
macatalacad cu queni
cabang babation co reng biga
a tatanguis at cambe cung susucad
nung nu’anti na caracal ing lua cung metipun
queng tutulung imalan

titimbangan do reng cacung talampacan
ing babaiat cung catauan,
ing metipun a danum uran,
quilub da reng cacung sapatus
susucdan cu ing pilatan
ning samula at angganan
queng simulmul a misabit, tauil-tauil
gilid ning susulud cung cupya
a pilit nang iangat ning anging lalabul—
maglual-lungub quing busbus cung arung

maninap cu
at queng cacung paninap
e nacu bisa pang maninap.



**************
Algeria, September 2010

Sunday, 29 August 2010

minum! mangan! magdiuang!



Friday, 27 August 2010

Napun, Ngeni, Bukas



Tuesday, 24 August 2010

GONE TOO SOON

(An Elegy For A Friend, Heidi)
-- by Oliver S. Carlos





she – vibrant feather
dancing freely in the air —

thought us, shared with us
the meaning of youth.

like her pencil sketches of petals
willingly drifting

her smiles sailed into our shores
unselfishly (even in her own pain)

she brought to us those timid laughter
which were seized and taken back

from us . . . from them
who shall never see us smile

now that she’s gone.



****************



A classmate and a dear friend during my high school days, Heidi (1967-1999) is the 2nd child among a brood of five children. As a child, she was fun and vibrant. She attended Holy Child Catholic School, Rajah Soliman High School and University of Santo Tomas. She was blessed with so many God-given talents ... she can sing, dance, act and draw. Her voice blends well with her other sister Jen. They both donated their time singing gospel songs at the church. They love to hang out together, keep secrets to each other and stay up late till dawn like they will never run out of stories to tell to each other.

During her teen years, she enrolled in martial arts, speech classes and piano lessons. She loves short walks on the beach, collecting rocks by the sea side and marveling at stars in the night. At school, she was often voted as the President and Muse of the class because of her intelligence and beauty. Every summer, Heidi was always chosen to march in Santa Cruzan processions where she always holds the Reina Elena title ...the highest tribute that could be paid by a woman’s beauty is to be selected as one. Both her parades in Manila and her father’s hometown in Pampanga left every one with her marks of beauty and elegance.

She wished to be an Architect to follow her father’s footstep. She took up Architecture at the University of Santo Tomas. Her drawings are works of art, intricately designed by her beautiful hands. On her 3rd year in college, she took a respite from school to fight a battle against lung illness. She fought a very hard battle but her battle is now over, God had called her HOME.


Heidi's life is a gift to us. You are never forgotten. We miss you and love you!

Sunday, 22 August 2010

Pluma, Letra, Poesia



Saturday, 21 August 2010

mga dahon





************


binabakas ko
sa damuhan -- na minsan nating inupuan,
ang mga pangako
ng pag-ibig na walang hanggan.

sa aking pag-iisa,

patuloy kong naaalala
ang nakasahod mong kamay

sa

mga dahon

na

paisa-isang

n

a

l

a

l

a

g

l

a

g
.
.
.

tulad ng mga pangako mong walang-tatag.

Wednesday, 18 August 2010

Haiku Kapampangan 10

Monday, 16 August 2010

Haiku Kapampangan 9

Saturday, 14 August 2010

Haiku Kapampangan 8

Thursday, 12 August 2010

Haiku Kapampangan 7

Tuesday, 10 August 2010

Haiku Kapampangan 6

Saturday, 7 August 2010

Haiku Kapampangan 5

Thursday, 5 August 2010

Haiku Kapampangan 4

Saturday, 31 July 2010

Haiku Kapampangan 2

Wednesday, 28 July 2010

Haiku Kapampangan 1

Monday, 26 July 2010

Tanka Kapampangan 22

Saturday, 24 July 2010

Tanka Kapampangan 21

Thursday, 22 July 2010

Tanka Kapampangan 20

Tuesday, 20 July 2010

Tanka Kapampangan 19

Sunday, 18 July 2010

Tanka Kapampangan 18

Friday, 16 July 2010

Tanka Kapampangan 17

Thursday, 15 July 2010

Tanka Kapampangan 16

Tuesday, 13 July 2010

Tanka Kapampangan 15

Sunday, 11 July 2010

Tanka Kapampangan 14

Friday, 9 July 2010

Tanka Kapampangan 13

Thursday, 8 July 2010

Tanka Kapampangan 12

Wednesday, 7 July 2010

Tanka Kapampangan 11

Tuesday, 6 July 2010

Tanka Kapampangan 10

Monday, 5 July 2010

Tanka Kapampangan 9

Sunday, 4 July 2010

Tanka Kapampangan 8

Saturday, 3 July 2010

Tanka Kapampangan 7

Friday, 2 July 2010

Tanka Kapampangan 6

Thursday, 1 July 2010

Tanka Kapampangan 5

Wednesday, 30 June 2010

ibpa at anak

marayu la nung misan
ding biga
king malanging pampang
nung misan
malapit no man.

anak ing aus
king pamilual da
ring saput ning paninap

ning metung a ibpang magdulap
milapit ya sa
ing pampang ning taguimpan
karing bigang tatalangan

karing pangarap
a misan, lalaut
misan naman ayayabut.

metung a ibpang
paulit-ulit mang mabibigu
pilit nya ring iyatsa
libutad ning ilug
ing pangabyayang pukut . . .

para king anak nang bingut.



******


also published in eK!/versilog

Monday, 28 June 2010

sispayr

Macanyan na pin man, calupa da reng minuna caya
mengalsut mu ibat qng alimpuyu na ing mangayumung salita:

“ Culayan ta yang maputi ing macacadcad a dulum. Pag-imbutang ayampat
ing tutularing daya caring quecatang sugat. Micawul-cawul, misabi-sabi
ban mitabi, mapawi ing asuc ning cagutgutan caring danggut da ring baril”

Malapit qng gabun a queyang tatalacaran, quing metung a cutcutan,
mipamisan lang ginuliac ding mengamate caual; mequi-agnan
qng pait dang tagulele ring anacpauas a mibulang, mesayang-bie
caring cabunducan— papaypayan na na ngeni ning dicut-deuagan
tinubu, ban tacpan no reng cutcutan dang alang lagyu, alang sucat piquilanlan:

“Nung tinulid yu sana, canita pa, ing quecong camalyan, ing baluctut yung
patacaran, malwat ta na sanang payapa, malwat na sanang mepupus ing sabla,”




********


also published in eK!/versilog

Friday, 25 June 2010

gulis keng pilatan

Maluat-luat na rin, deng taung makapadurut quecata isipan da alang
mangatbanan a suliranin.
Bala ra, asna la kaimpis ding pilatan paulit-ulit tang pangatawangnan
a lalasacan –
pilatan ning kawul at pamigulut, ning uma ampo ning isding. Acaquit da
ca, acaquit mu cu.
Dapot e cata micaquit.

Atin tabing a migit macapal.
Macapampan.
Pilit na cang lalaut at sisilauan.

Nung nya pala agyang isipan cung cayagnan da ca, deng tacbang cu
migit lang mapangangas at mumuna queca.
Buri ra ca mang isaque quing matibe balsa, buri ra ca mang acasaup
mamagse papunta quing pampang
a dapat tang puntalan, nung migit mung pipilinan ing magpabiling-
biling qng pagkeran, ing magpayata-yata
qng malambut mung tudturan, ing migapus cabang-caba
quing talicalang macacalicat caring batal ampong gamat –

nanu mo ing acarapat cu?

Yca na ing migpasya.
Makagyung yacu, balu cung macaba ya pa ing dalan a baltangan.
Dacal pa dapat gawan.
Malaut pa ing lacaran papunta qng parasan.
Dapat co pa waring bagalan ding tacbang?

Cabang balu cung aldoldo ating mibubulang, ating bayaning susubsub
caring asican at caquewan,
anggat e sisilip ing malutung aslag ning tagumpe’t catuparan, malaus
cu, nung nu ya maka-ucul ing bie cu.

Nung inia ngeni, caring lua cung e na langi capilan man
tutuntun que’t tatatak ing gulis quing quecatang pilatan

Talacad cu queni.
Quen ca manatili.



***

also published in eK!/versilog

Thursday, 24 June 2010

ing kakung laun a letratu

nukarin ya kaya keni? ing balamu dimdam ku
e ku atitiyak nung ninu ing kukutnan mu

ing laun a letratung tatalnan mo?
ing sarili mo? o yacu?

atyu ku ken

nung pakalawen mia mu, agyang mengabakbak ne gilid
melumlum at menamuti na ing dampul, a-yaninag me pa
ing makadukung impun— ing sanga na ya mung mekua –
ken . . .
king bandang wanan

banda keng kagulutan, atyu ken ing gasgas ning dalisdis
ati lu ken, ding mamilagua’t tatalilis a bakas-talampakan,
ing patak-patak a dayang
pilit nang sasalikut ning makatubung talaib mingatbang gilid;

king gilid ning gasgas a yan, akit mu la naman
ding balamu tatalangang amorseku,
ding dicut-malamarineng ngara nang magtikum
ngara nang bukadkad
kabang didilatan nala ning lalbug a yaslag.

apapansingan me ing makayalsa at pakabang gabon
a babante’ na’t kikyakan ning lalanging impon?
sipatan me
bandang lalam
ken . . .
ken mismung aplusan na ngeni ning kekang taliri—

atyu ku ken

e mu na ku mu pin akit makatiman, e mu la mu pin akit
ding kuyum at maka-tas kung gamat, kalupa kanita .

(mekua ya yan kaybat kung mibulang
ken da ku kitkut ding kayabe, kaybat ning laban;
kaybat ming mibarilan ding pasistang militar)

Sunday, 20 June 2010

masabal quing balen

Suluc niting pusu nucal ing tinubung
Pamagmasabal quing balayan a indu
Yagcas ne ning labi— tulac na ning salu—
Pilit de mang tutus ding lilu’t palalu

Lugud qng carinan, gabun a migcanlung
Caring panaguimpan at musmus a layun
Pilit ya mang sagcan, quing pusu magbalung
Nung milaut ya man -- mibalic, e mamun

E la lubus magpiac tiguleleng mata,
Nung ing acaquit da yanaman at iya.
Ding mangaparusang cataua’t caladua
Dalit catimauan y lang tatangis da

Managulele ya ing pusung maglucsa
Quing lunus-cabilian da reting maluca
Dulum ning suculan misalmac la calma
Late, tumbuc, paldac, quirut ning culata

Quing peca-butud na ning pusung manangis
Ing dayang bayani pilit yang mitindig
Guliac at guliac ya quing sacal ning imbi
E re abusalan asbuc nang mamapi

Patye iting lugud qng balen migising
Sicdu ning pamialsa e ra na apigil
Sinding anting api, e ra apatda man
Ding sucab a lider a mamanalipan

at quing calabcab na carin la miderang!

Thursday, 17 June 2010

para canacu

sapat na la ring balang abac
a acacapcap no’t asasalat
ning taliri cung magdulap
ing quecang

labi

batal

buac

salu ampong gamat.

ica ing abac

ing caul

ning tula cu’t paninap.

Friday, 11 June 2010

ticum

makasubu ya kaya ing pilak a kutsara
ibat pa king pangabayit na
lual-lungub ya

ing bie na karing pasbul.
nung misara ya man ing metung,
mipnung tula, masaplala
mibubusni la ring adua

nabengi, belikwas naku
ning matsurang balita.
pipiling kung mipangisnawa—balamu
kapilan pa

makamulala ku king mulala -- ngeni
pag-umasdan ke
malulam ya ing lupa nang makasibi
kasing-lulam ning bie napun a bigtasan;
mesayang
king waldas nang katuliran

manyingil ne ing dalumdum—
mamaplus,
tatalukbung
karing mata nang makatikum

alang awang

alang pasbul

lagyu yamung makaukit king lapida

keng pantiun nang
makakalale misasara.

Tuesday, 8 June 2010

chop-chop




buri ku sana, kunanan mu kung letratu
keni, kilub ning bale ku –
buntuk keng inidoru,
atyan at salung mikalat keng banyu,
bitis at gamat keng sementu.

e ne man akua ning kekang lenti
ing sadyang timan karing pisngi ku’t labi,
pagnasan kung keng balang pitik da ring kekang taliri
abulalag mo karing sabla, malilyari ing anti-kaniti.

ibalandra mu ku karing anggang diyaryu
anti mong metung a testamentu.

Saturday, 5 June 2010

pamagkambil

makasabit ya ing sandata
keng dalig ning kapagalan
e pa mipagpag,
midayu,
ing silab a talsik
ning palburang mesyas
memuu
kareng gilid na ning pulu at tambutsu.

magsupling ya ing babagwa
kareng madalumdum nang suluk.
sala-salambitin
karing pilak a saput a keyang lelangan
kabang ing kalbitan at pisisipatan,
ditak-ditak neng ngangatngatan
ning taksil a kalawang

alang gamat, larung ngungut,
o agyang basan a manamulis mu man,
manatili ya king keyang pangasabit—

manenaya
mamasang masaglawe la mu man
ding salita ning lebasan a pait,
kasakitan, katapangan
libutad ning pamikelangan
a linumud ning akbungan at punglung mikakaluku

manenaya ya
at manatili yang manenaya

kabang ing babaguang
sala-salambitin at magduyan
‘yang karelang pupugayan at dirinang parangal.

Sunday, 30 May 2010

munag-sumala

misalbag lang mengaring bula
ring dinatang king labuad

ning kawatasan

iniang digpa yang mitmung dingal
ing metung a alino— libutad
ning kayalan

iniang ing dinugpa atin yang kayabe mikakalukung
alikabuk a ginogo ning anging giligit a maniupan

iniang ala
metung man karing pantas
ing mekakilala, ing kinilala
king kawatasang piglaju na ning lawe—
maratna at mangataram
ning dinugpang balawe—
e re kalupa sasambitlan
e re kawangis pamanapse

dinatang ya ing kawatasan

kayagnan ning makayagpang gamat
ning makayumang a kamatayan
ning panabilin at tauling pamun ning makapase, makarate,
ume mate, pauli ning alang patugut a guliak at lipakpak
ning matikdi, bayu-pakpak a talibatab—
migising

king pamikurap-kurap ning bulan

bulan, a pupulingan na’t bubulagan ning paldas a bigang
dusuldit daralan king kayang arapan

angga king ala neng apikudta metung mang kawatasan
ing melanging labuad

malakwan ya ing balawe
malakwan ya king balawe
ing kawatasan

magdili-dili
mayupaya at mitmung sikanan

Thursday, 20 May 2010

dispersal

Akakit ku
babalasbas do ring truncheon
karing katawang mipapase
tatalakad
pasibayung mipapase

Akakit ku
sisikwat do’t wawasiwas
ding kalasag—
susungalngal do karing asbuk
king lagyu ning kapayapan

Akakit ku! Akakit ku!
tutulari
sasagitsit
ing daya rang
emu ayamyam ipagmulmul
bayu ra pa idura king matuling a danum.

At kabang iyatad na
ning mamagus a kanal
patiyanud king imburnal
ing dayang kukulam—akakit ku

singap-singap yang malulumud
ing kekatamung katimawan.

Wednesday, 12 May 2010

paquibat at pamipalino

Nanu ing sangcan o ba’t maglacbe ca?
Ing dimla quing silid e cu na apibata

Nanu ing sangcan o ba’t maglacbe ca?
Yang masampat gawan. At quing bie cu sadya cung
gagawan, caring balang dulum at aslag a daratang

Nanung susulud mu?
Cupas a maung, matuling a t’shirt, matuling a baseball cap,
matuling a medyas

Nanung susulud mu?
Ala. Agyang nanu ala.
Balabal nia ning aclis quing isip cung magcasaquit.

Ninu ing casiping mu qng tudturan?
Caracal da. Acasuyu. Acayalung. Balang bengi.

Ninu ing casiping mu qng tudturan?
Saldac a pangisnawa.
At ing alang anggang ala. Ibat pa quing pasimula.

O bat miglaram ca cacu?
Canita pa sasabian cu ngan ing tutu. Yta ing sabla cung balu.

O bat miglaram ca cacu?
Uling ing catutuan, calaraman mu naman.
At dalise cung liguran ing catutuan.

O ba’t lalaut ca?
Ala nang ulaga pa ing sabla— para canacu.

O bat lalaut ca?
E cu balu.
Buung bie cu, e cu abalu.

Angga cu capilan manenaya queca?
Mapagal nacu. Bisa na cung magquera.

Ica, mapagal na ca?
Wa. Mapagal na cu. Bisa na cung magquera.
Matudtud cabang-caba.

Thursday, 6 May 2010

matbud a talikala

mi-adornuang talulut ning mabanglung rosas,
ali, e ke swatan, pag-inakitan o panagkasan mu man--

ing makapaluput a talikalang ini karing gamat ku’t batal
e ne apingas ing pangatau ku’t dangal, kapilan man
e ku ituring ing sarili kung metung a alipan
a e mirinang ditak mu mang dangalan.

ing martinis a daralit, kilub ning awla nang misapinan,
mipalibutan, karing laurel a pina-pinandit nang tutuktukan,
e ke wari milulupa kabilyan?

pait wari at e yumu ing kayang panamdaman
king lusuk a kalumbayang pepasari
ning migapus at mikulung nang kapalsintan?

lele ding sampagang mamatna king ardin ning tula,
makatuknang la karin, iyagkas no karin,
ding dalit ning kekeng lugud.
at king lamyus ning malugud nang pamigale,
ngening bengi, pasibayu keng pataran
ing matbud a talikala
ning bawal a kapagnasan.

Monday, 3 May 2010

panas queng igu

Tatatap na ning indu ing abyas nang kipkupan.
Dacal pa carin. Mababalag, masasayang
madadamusac qng kiskisan.

Mipapayid, nga ranang talacad
nga ranang sakinda ding panas a malutu—
misasaglulu lang macalual qng igu.

Tutu, y la man maranup la
dapot lilisyan da ing bagsac na ning lua
ning indung balisa at mipapagaga.

Tatap ning salu . . .
cayagnan ning tatap
quing abyas a mumu.

Nu yapa mayntung panyuglung?
Bawal nang mangupkup carin qng kiskisan.
Ing bie mag-hikahus bawal neng suglungan.

Ding panas, e ra man sasaryan
ing pamamirapal,
anti la mong makitangis;
anti la mong maki-simpatya

qng balang tatap a balisa

caring saldac a pangisnawa.

Friday, 30 April 2010

retiradu

Mibabalic la ring tacbang
Nung nucarin no inumpisan

Quing pamitucnang, e na a-iwasan
Ing baliquid qng queyang pibatan

Titimbangan na ning isip, e pa sapat
Nonti man calaut ing queyang a-lacaran

Culang, agyang ing nanumang ayampang
Ning masalusu nang pamilacad

Quing aslag-pali ning ka-ugtuan;
Minatba yamu, dinalan ya ing bie

Nung macananu yang minatba at dinalan,
quing pilapil nang babagtasan, ing dagis-asican—

¬¬sinulud ya quing dicutang
e ginalo, e minugun ditac mu man.

Saturday, 24 April 2010

pacamalan cu la ring quecang talampacan

E mu sana pagtacan
nung qng ba’lang pamisiping
uman cu la at aplusan
ding quecang talampacan

Miglaram cu—
queca at qng cacung sarili—
‘niang sabyan cung e’ ra ca caluguran
na e’ co agaganaca, aguiang minsan,
ding biluy caring miyatba mung pisngi,
ing yumu’t misteryu da reng macatiman mung labi;
ding macalipang a quislap
da reng malamarine mung curap

Lipus da cang pacamalan — yan ing dalise catutuan
catutuang e ra mu man apawaga
ding mata cung micacunung payulata.

Uman cu la at aplusan ding quecang talampacan
e’ qng y la cabud
ding liguran cung parti ning quecang catauan;
Pacamalan cu la — nung macananu cong pacamalan
ding sablang bague makaugne queca—uling yla
ding talampacan
a macalale tinacbang

quing danum,

quing angin,

quing gabun,

caring dalan at asican---

angga na quing yacu ing carelang atabnuan.




*** also published in eK!/versilog

aninag

ipasiag ta man ing sabla
nanu pa wari ing maliaring mibayu?

bukud king metung ya iting makabang pamipalino,
mibulalag namu naman, agyang karing Kasulatan:
-- e mayap pagnasan ing anggang bage ning sikluban;
-- ating kaatbusan king keyalang-payintungulan

nung makanyan

nanu pa ing ulaga na


ning pamipagtalamitam?


ning pamiugne-ugne, pamangabaldugan karing bage?

ning gaga?

ning gulisak?

ning inge?


o ba’t e ta ya salatan karing kekatang kanwan
ing metung a aliwa?—

pisanmetung ta yang ibuknul
aplusan ing sala
king singap-singap a kataimikan

muman kaniti,
king pamikapkap tamu libutad ning dulum
nung mikusad tamu, atalastas tamung malapit mu
ing pigaganakan a marayu

abalu
ipabalu
deta mung susuri’t managulele king dulum
ila’ng maniwalang abulag na no niti,
ila mu reng lukluk,
mibatang makapiyak
king metung a suluk

e re akit, kapilan man
ing maputing alinong megkalaman--
linagpus at dinalan king karelang kalibudtan

e re atalan
danggut namu man ning kikislap nang imalan

e re apansinan
ing salamin
king karelang arapan

a dapat dang lawan.
at dapat lagpasan.

Monday, 19 April 2010

quecong mal cung caluguran

ing taling miyaptas at mitungi
caring pisuluan tang aldo’t bengi,
quecayu ya menatili. angga man ngeni

corona lang mipuputung,
diamanting miyayampang caring quecong candungan
ding papuring quiquinang,
ding sampat a dangalan,
a meguing bunga ra ring quecatamung taguimpan—
ngeni saslag

cambe ring e mebauas yung timan—
becalan yo reti, ibat qng ardin
ning quecatang camusmusan.

macanyan pin,
mialung cayu at magcanta.
mipnung laia. magtumayla.

ganacan yu la, aliua ring dulum
a pigalgalan at pitacutan
nune ring benging masalang
mitatayid tang lecaran

at quing pamagcanta yu’t pamagsaya
nung datang ing panaung ala na ninuman
ing maquitula at daramdam

ganacan yu sa

maquitula cu’t titiman
libutad ning mepatlud cung capagnasan

ning caguiwang macarate

ning magdili-diling lumbe.

Sunday, 11 April 2010

Tanka Kapampangan 4




* thanks to Mr. Peter Musngi for all the wonderful photos

Tuesday, 6 April 2010

Tanka Kapampangan 3




* thanks to Mr. Peter Musngi for all the wonderful photos

Monday, 5 April 2010

Tanka Kapampangan 2




* thanks to Mr. Peter Musngi for all the wonderful photos

Tanka Kapampangan 1




* thanks to Mr. Peter Musngi for all the wonderful photos

Saturday, 3 April 2010

Ing Mamikudta




iya ing panaun.
ing mayaslag a metaporang pepalual ning ligalig;
ing manene dampi ning anging maglagalag
nung minsan, lulam—
tatalukbung at kakaul king dikut ning labuad

iya ing danum. aliwa ing masias a diamanti
makalto’t kikinang dapot mawawala, aliwa
ing melumud, mikutkut lalam at meyalang-ulaga

iya
ing keng salusung ilug, matipunung griyegong
makadungo king malino danum, ban samba’ ne
ing kayang larauan a magpanibayung-ubug
maging aping mimindayug karing mata
king balang pamilukut, pamilantang ning alun

iya naman ing agus -- wasang-wasang
king kayang pamaglakbe, at king katatawlian
pamagpasakup mu naman king sepupunan ning dayat

iya
ing king kayang pamaglakbe, mipalibutang alino—
matuling, maputi, nung minsan --- ala nanumang dampul

memaglako, milako ing sabla kaya.

e no man kasi miyuyukit a mengaring letra karing barya,
ding egana-ganang recuerdu ning lugud
ning tula, o agyan ning mayumung alduk
king kalis ning pamipalsinta

dapot
atin mu namang malalakwan,
at deti, manatili la kadalasan

ding salubsub
a mumungul king pusu – malalam la pangatusuk.

Friday, 2 April 2010

Sabyan Da

Keti king paglawtan, nung makasiguk mu ing makadukung pale,
mapait yung damdaman: sepulyut yula at simsam
ding alang kamalit-malitan, ginapus yula
ring mala-anghel dang sagakgak, lalam
ning kislap-andap a yaslag keng dicutan—
karing iskwela’t pipamyalungan dang
sasakluban na ning banua
ban keta
masagad dong panabitan
ding uyat at butul dang ala mu mang karanasan—
damdaman yu sa ing papesus-pesus a kalaksing;
isalaksak yung anggang binit
karing arung da’t gulung-gulungan
ing bulu ning pale,
ing giligit nang pali ning marangle;
angga na king ila—lastag at mepata katawan—
malaus lang mangamate --- e ra pa man araranasan ing mie

alang-alang mu
king amanuan yung pangatigho.

Thursday, 1 April 2010

ing lugud ku keka

Nung ing sablang bage
Keti king sikluban

King upaya ning Dios
Takdang mapupus ngan

Mayulagang bage
Kaku sang sambitlan:

Pakamalan da ka
Sintang mipnung leguan.

Lingap ning salu mu
Yang bibie sikanan

King mapupupud kung
Tula at taguimpan

Takde masaplala
Yanamang balikan

Nung datang ing aldo
Niting kapupusan

Nanu mang malyari,
Nanuman ing datang

Ing lugud ku keka
Alang kawakasan

Wednesday, 31 March 2010

Nung Sabyan Ku

masementu ya kaya
ing lalakaran kung kalsada
nung sabyan kung pakamalan da ka?

maging dalan kaya nung sambitlan ke ing amanu
para akapkap nong pasibayu ning lulam kung panimanman
ding bitis mung tatakbang karing pilapil at linang?

nanung salita ing sukat makayaplus
king salu kung mangulila?

nanung salita ing sampat
para kakung atanggap

na egana-ganang memilatan kekata,
ganap at mepupus na?

makananu kung tanggapan
na ing kekatang daramdaman
ating kapupusan

nung payulit-ulit
tatangisan ke at babalikan
ing kekatang milabasan?

Saturday, 27 March 2010

Quing Tauling Aldo

Ding pengan nang pucyutan ning gugulisac qng ilang
inapsa na la naman—
bilang amanung mipnung cabaldugan at catutuan

Tuliran yu la ring dalan! Mumuna cung dinatang
dapot dinatang ne, minuna ne, bayu cu pa datang.


Atin waring mequiramdam?
Ding mapilan quecatamu – minabut at tinayid
quing quiquislap nang imalan— migtabili la naman
agyang mibulalag caring mata

lecaran na
ing alun quing cadayat-malatan,
pepatucnang na
ing giligit a labul ampong bulus a uran.

Miyayaliwang dapat, macapagmulala
agyang misan, e na arapat
ning ninunu tamung mipanabilinan.
Macagyu mu quing pepalub na la
ding midinang lagyu,
ding sinese,
ding pitacutan.

Y nunung Noah y yang miyatasan. Dapot y tamu
ing paliping melacuan at macalulan
qng bayung arcung dapat sanglad, bayu ya pa maspac
ing aslag quing cayatbang pampang.

Tutung magsadya tamu
libutad ning pamigalgal,
ning tacut,
ning pamagduda’t pamiquelangan
quing panayan, quing titiyacan a alang catiyacan.

Cabang mamisulud tamu
caring miyaliwa-liwang payintungulan,
cabang iyagcas ta la
ding dalit ning capuryan
ding litanya ning macalyu’t durut-durut
a pamagsisi ‘t camalian
masampat mu quing gagawan ta iti
para qng sariling caligtasan

Iyalsa ta la at cacabugan ding salung magmapuri, papasiag
qng mitmung dangalan, Yacu ing banal! Yacu ing banal!
Libutad ding demusac ta carapatan, libutad ning burac
a besibas tamu caring mata ning metung at metung

At quing Queang panyatang, quing Queang arapan
samantalang mangapuling tamu, o malaus mangabulag
mamin tamu, mamin tamung mipnung capacumbaban
e ta la icuang apalub ngan
ding paris-paris ning sablang lelangan.

ini metung yang gasgas a kawatasan, king pamagat na pamu, “uran”

pauna ku na keka
ini metung yang alang kuwentang kawatasan
uling balu ta ngan, ken pa mung pamagat
gasgas na la, deng kawatasang maki-kaugnayan
king madramang kwentu ning tutulung uran

dapot, nanung akarapat ku, pauli na ning pahamak a uran
angga man ngeni, asne kaplas ing siku kung mengagasgas
iniang misan a tegalan da ka at kabud na ku mitaluras
miyasawang right-cross at uppercut pa
ing tikman na ning limbag kung panga

e ka kasi bisang makiramdam king palino ku’t sasabyan,
pane kang “i hate you!” pane kang “i hate you!”
“cannot be reached”, ngana pa ning cellphone mu

pepalual me pa’t tinali
king arap yung pasbul
ining german shepherd a maragul
balak me pa ‘tang payalmusal
ing siku cung migkule-brown

e ka migaganaka
kaung ku keni— kayagnan ning asu.
e ku mako kening arap ning bale yu

buri ku kasing abalu mu,
pisan ke rugung buu
itang kasukub ku
iniang aldo mumuran a asaganan mu ku

sigi na dear . . .
pakisabyan mu na ku.

Thursday, 25 March 2010

Queng Auang

Dalumdum ing aus
qng garitun a manenayang makaimpil quetang suluc dalan—
mibanding candungan, santungan
ning limang-banuang ketwan ning quealan muang


Dalumdum ing aus
qng sasapua’nang maranup a dungus,
qng miyanggiang pamandacap na qng tudtud
libutad ning lumbe, aclis, caul,
ning anging mipnung pait a lalabul


Dalumdum ing aus
qng ulasan nang lulam at tatalucbung nang dulum—
a maragli nang gigilian ning salang-aslag a manibatan
caring saquen a sasalincu careng misaga-saganang dalan.





___
*Iniang magaral cu pa Binondo, maralas cung daralan patye mamilagwa cu qng quilub ning Manila Textile Building (gusali re ring Isic nung nukarin la mayayakit ding mangasanting a tela ampong mantil) qng panulucan ning Abad Santos Street at Claro M. Recto bayu me dasan ing Tutuban. Nung mag-shortcut cu at lungub qng building, agad queng dasnan ing Meisic St, nung nocarin ne man ing cacung pipagaralan. Neng mabebengi at mumuran, maralas keng apapansinan ing metung a limang banuang anac a macabacutut qng caritun a dapucanan lata, diyaryu, boti at nanu mang apupulut at misasali qng magbote-bakal. Agaganaca que, balamu acaquit que balang titicatic ing uran…balang benging macabatyo cu qng awang.

Ining kawatasan iampang que kaya…nung mabie ya pa, nung ikua na pang mebie.
___

Monday, 22 March 2010

agyang anti nang angin

nung macananu nong aplusan
ning susuyung anging amian
ding bulaclac quing deuagan
macanyan da cang pacamalan

alang-alang queca
ala cung e agyung gawan
alang laut a ecu alacaran
alang dulum a ecu abagtasan

inia pane mu sanang isipan
micanlaut cata man
agyu ra cang caulan
agyu ra cang uman

igapus da cu man qng cayatbang dacu,
queng siping mu, agyu cung magtalungcu
para isitsit queca, quing mipnung lugud at suyu
atyu cu queni, casiping mu cu mu.

iculung mu sana qng quecang caisipan
ing sumpa cung manatili capilan man
nanuman ing malyari, nanuman ing casantungan
agyang anti nang angin, datang cu at datang.



***********
22December2010

NUNG BISA CA

Nung bisa ca atchi
Yacu nang mamimipi

Yacu nang manese
At magpacan babi

Nung buryan mu naman
Bang e misakitan

Ituru miya'ing gripu
Yacu nang maniaclu

Deng quecong tapayan
E mo gaganacan,

Pilan mung minutu
Mika-danum la ngan

E mu sa pagmaynan
Nung queca sasabyan

Dimut kung caguiwan,
Tipunung catawan,

Buri queng isuyu
Alang cayangganan

Caluguran da ca,
Aminan cu naman.




------
September 2009
Oran, Algeria

Sunday, 21 March 2010

Sonetu Quing Amanung Sisuan

O’ dila rang mequitiltil / ayamuyut niting yatu
Pauli na ning layun dang / talamitam caring tau
Quing labuad a pigdatunan / guincas da la ring amanu
Picarine dong iyapse / ding catayang quetutubu

Taclub-bancuang, menganyaya /qng balayan a piglualu
Sasangcan da reting lobung / quing tupa migbalitcayu
Nung bisa cang salese bie / iyacmul mo ring prinsipyu
E na baling malaso ya’ ing / sinese mung pangatau

Nu re dela ing masabal / quing indu rang mesipjayu?
Corona nang lante gintu / piglibe re caring tangsu
Sinacuil de ing amanu’t / panugaling acagisnan
Deng poesia rang mengalalang / E do buri mang babasan!

Mamaus cu! daralit cu! / quecong anggang Capampangan
Nung mawala ya’ing amanu / ala ta na … ala na ngan!

Saxifrage

Bibislacan mu la
ring mangatibe
mangasias
a tipac ning batu

Cuculate, mangalsut la
caring balang gatla
caring balang gasgas

ding amut mung macapasno
lalaso
caring sesesen dang caplas

Quing babo ra, mamucadcad
sasalingalngal ing banglu
da ring talulut mung

mamatna, babatyo qng aslag
teterac
maquiyalung qng anging banayad.

Nuan ca caring sabla.
Ala nacu sanang dapat panayan.
Ala na sang aliwang dapat pang pacamalan

Sayang
Sayang mu pin at sayang

quing aliwang batu
carin ca ngeni macatanam.

Thursday, 18 March 2010

Batsheba



malwat na neng ginabac ning haring quelugdan
ing queyang imalan – qng emu nanung capagsisyan –
iniang igulis neng Rembrandt ing quecang larauan

cabang mandilu ca
cabang macalubas ca

manalete caring cacung uyat
quing misasalab cung panimanman
ing sala-salabid a capagnasan

casalanan
nung salatan da ca ngeni
nung pulisan da ca catauan

Ing sala ning isip, sala ya naman
sala yang alang capatawaran!

e cu gawan
e cu gawan

guingcas na ne ning Tiburan
ing mayap a balita ning caligtasan.

Wednesday, 17 March 2010

despedida

picacasaman mu ing pina-pinandit dang busina ring saken
ing palipat-lipat a indredus at sitsit da ring siping bale

ing gulisacan da ring cayanacan
a pasulapo buradul qng babo bubungan.

mabubuluc ne talaga ing yatu — ing paliwanag cu.
mayayagnas ne ing bale tamu – ing pequibat mu.

iniang benging ita,
migugulut teng pequiracpan ing tudtud.

kilbit nacu ning galingaldo
e cu apagsaryan

ing bigla nang pangacayan
ning cama tang pitudturan.

Tuesday, 16 March 2010

Quing Panaung Yta

Quing panaung yta, itas da la ring carelang gamat
quing casalpantayanan

cabugan do reng salu ra at saca la mangacu:
Tupad cami! Tupad cami! Caring anggang Cautusan!

Atin lang lubasan angga na quing catataulian dang imalan –
misulud lang basan
ding mibagsac caring tronung e ra buri mang mitagquilan

Nung macananung anti mu naman,
ding carelang pinili at piblasan,
ding perada ra at pepaluclucan,
y la namang mangamcam.

Nanupa’t quing lula rang pamagdulap
qng catuturan ning salita,
mangapalatid la
caring pate-pate rang pamangabaldugan.

Mayalang-ulaga ing sabla.
Nanumang mitangca, muli mu qng ala.

Mibalic ya ing minutus, antimong pati-pating
picablas-cablas na ring queang bagius, quing babo
ning gewa rang daluyung at gutgut

ibuclat na la ring quiquiac nang tuctuc
at saca no idalpac ding bitis nang mitmung daya

misayad ya qng labuad
ing salu nang mitmung lumbe,
mamagdalum, maningaya

uling cabang guguliac de ing amanung “Y tamu ngan”
dasna no reti quing sugatan dang pampang

mipanyacma’ la’t mipamangan—laman quing laman.

Saturday, 13 March 2010

Bulung

babacasan cu
qng dicutan - a misan tang pipagqueran-
ing mipnung tulang milabasan

qng cacung pangalucluc,
cacapa no ning inagap
ding e cu acalinguan mung gamat—

macapalad

caring bulung

a tunggal-tunggal


m

a

b

a

b

a

l

a

g

.
.
.

calupa da ring sumpa mung alang-tatag

Wednesday, 3 March 2010

Keng Upisina





----------------



PATALASTAS:

Caring angang Kabalen Kapampangan,
Agkatan daco pung mamasyal, mamasa, at pinamnaman ing literaturang Kapampangan karening bilungan (sayt) a makatuki:


http://eksite.com/versilog/



http://eksite.com/



http://ceramtex.com/poecia


http://papaosmubal.wordpress.com/


Dakal tamu pu abalung bayung bokabularyung Kapampangan at igit ta yang apilasa ing panga-Kapampangan ta mu pauli da reng mangasanting a poesya, sanese (essays) at miyaliwa pang akdang Kapampangan.

Makanyan mu rin, adwan mi ing saup yu na ikonekta la at ipangumbira reng mesabing sayt kareng kekong blog or aliwa pang social websites.( FS, Multply, Tweeter, Tumbler etc...)


Dakal pung salamat

Tuesday, 2 March 2010

Cacung Anghel


Quing panaung bubucnul que caring apat ng danggut
ning ulas ing galingaldo alang-tudtud --
tepican mu cu pago.

Quing panaung titiltil ya ing caisipan
qng basu ning lumbe,
mayntung pali’t capasnawan ing gilgal a labi
qng tasa ning kape --
lebulan mu cu pisngi

Quing panaung pamulsa cu la
ring saldac a pangisnawa,
ring tajimic a pamagmalun,
a tunggal-tunggal cung babasibas
caring alun ning gatpanapun---
inuma mu cu labi

malwat

malwat cung mengadi
mignasa't menaya
qng pacpac ning anghel
a malyari cung salilungan
qng giligit nang bugsu ning angin at uran

Salamat
qng quecang panyatang —

anghel
a buung-bie cung penaguimpan

sangcan
nung bakit pupugayan co ngeni
ring ba’lang abac a daratang,

magtumayla ---
mitmung tapang.







--------
Winter 2010
Oran, Algeria











-----------------


PATALASTAS:

Caring angang Kabalen Kapampangan,
Agkatan daco pung mamasyal, mamasa, at pinamnaman ing literaturang Kapampangan karening bilungan (sayt) a makatuki:


http://eksite.com/versilog/



http://eksite.com/



http://ceramtex.com/poecia


http://papaosmubal.wordpress.com/


Dakal tamu pu abalung bayung bokabularyung Kapampangan at igit ta yang apilasa ing panga-Kapampangan ta mu pauli da reng mangasanting a poesya, sanese (essays) at miyaliwa pang akdang Kapampangan.

Makanyan mu rin, adwan mi ing saup yu na ikonekta la at ipangumbira reng mesabing sayt kareng kekong blog or aliwa pang social websites.( FS, Multply, Tweeter, Tumbler etc...)


Dakal pung salamat

Monday, 1 March 2010

"Pamagduman"

mamiquelangan cu, ba’lang durugpa ya
ing almiris qng daldacan

tatacut cung turan cu la
ring mala-kandila mung taliri

macatiman ca, cabang iyalu mu
ing sIngle lacatan. mayumu

ing timpla mu qng sabo ning pigan;
dapot, mayumu yang palac

ing labi mung
ala pang bacas casalanan.



------
March 1, 2010

Sa Bintana

Karimlan ang tawag
sa kariton na nakahimpil sa sulok ng bangketa—

inaring kanlungan
ng limang-taong-gulang na kamusmusan;

sa tutop-sikmura
naaanggihan niyang pagdakip sa tulog

sa gitna ng ungol, lumbay na ihip
ng kawalang-katiyakan.

Karimlan ang tawag
sa ikinukumot niyang pusikit at malawak na dilim

na mabilisang hinihiwa
ng liwanag galing sa lumilikong mga sasakyan.



--------
March 1, 2010

Wednesday, 24 February 2010

Pagdadalaga

Bumaon sa sandalan ang nangangalay na likod.
Mabagal
kasimbagal ng pedicab ang daloy ng buhay.
Baku-bako
nagbibitak ang itim na aspalto ng lansangan

Naghahanap ang kinse anyos niyang braso
ng kipkip na libro,
o notebook
na may mukha ng mga idolong artista

Sana ang pagdadalaga’y kasing-saya
ng mga naka-unipormeng dalagita
na nasa kabilang-gilid ng kalsada -- binibilog
ang usok ng kabataan sa gitna ng tawanan.

Nguni’t, kasing-ilap ng natitisod na bato
ang tinatahing pangarap –
lumalayo
habang lumalapit ang paa niya, kasama
ng maraming kinse-anyos
sa entrada ng pinapasukang pabrika.

Sa bawa’t lapat ng pintuang bakal,
may katahimikan,
kahungkagang sumasampal…
Realidad. Mundong hindi magkakatulad.

Sa loob
amoy ang nasusunog na langis
ng mga makina at retasong
inaabangan ng karayom at kamay.
Dito niya idudugtong at tatahiin ang buhay.
Bubuuin
tulad ng pira-pirasong telang ginagawa nilang basahan.

Limandaang bilog
na basahan ang tatapusin
bago pa maluwag na makahinga
bago pa magawang
kapain
alisin
ang mga hibla ng sinulid
na kumakapit sa buhok niya.

Saturday, 20 February 2010

Gunam-gunam Quing Cauran

Adwa cang pulung banwa
y acu labi cung lima
iniang sabyan mung:
ing tune lulugud, makanini ... makanita.


Minagtal cang bulung
caring adalanan tang cuayan—
a antimong alipang sisiclod,
magpuri quing gabun
qng balang tsup ning anging banayad,

at saka mo tiru ding macayagpa,
bala mu mibabayatnan nang sanga ning nara—
padugpa no’t sasayad ding malapad nang bulung
a mumuma caring makayusli nang uyat

macatiman ca, antimong anghel
a migbaba ibat banwa, cabang sisipatan
mong tunggal-tunggal ding mala-kristal
a amug caring balang bulung
a teterac
maquiyalung
qng mapalsinta nang pasyuc ning angin

ala cung ayntindyan caring sinabi mu,
pablasang quing balang quibut ning labi mu
carin la macalawe ring mata cu


cabang babatyon mu'la at panayang
matac at mabalag ding amug —
a banayad cucusad, magbaba
pepaybat caring bulung macapababo
padagusgus caring bulung macapalalam
angga na quing manacbag
at mabalbal la caring
manaya mung palad at canwan

adwa cang pulung banwa canita
at adwa nang pulung cauran ing milabas
agaganaca ra ca pa

ala nang aliwa pang sinta
a mipalili ibat canita.

Friday, 19 February 2010

Rearview Mirror


pasulyap-sulyap
minamasdan niya
ang mga bagay at kaganapan:

may tumatalsik na butones
mula sa blusang naroong tumanggi
naroong magpaubaya;

may laylayang umaakyat
sumusunod
sa hagod at kumpas ng mga daliri;

may pantalong
unti-unting sumisikip,
nakikipagbuno sa nanginginig na kalamnan.

saan nga ba galing ang mahika at lakas niya?
bakit kaya niyang pag-awayin
paghiwalayin ang isang pares ng mata--

nakatitig sa likuran ang kanan,
ang kaliwa nama’y
nakatutok sa kalsada.

pasulyap-sulyap
nag-aabang--
marami siyang nakikita.

Wednesday, 17 February 2010

Nakikini-kinita

Nang makalapit ako at buksan ang tarangkahan, napansin kong
banayad itong hinahagkan ng naglambiti’t nakayapos na mga dahon-
para bang napakaselan ng kanilang pinag-uusapan—may nais ilihim,
mariringgan sila ng mga anasang pahina nang pahina
habang papalapit ang mga paang sabik sumalubong,
nagmamadali sa paghakbang.

Ang mga dahon, ang tarangkahan—nagbubulungan.
Tila ba nahihiya o natatakot magsalita.
Tulad niya marahil na natitigilan, di-maintindihan
kung magpapa-tao po; akmang kakatok nguni’t
kagyat din namang yayapusin ng pag-aalangan.
Muling bibitbitin ang maleta at iba pang dala-dalahan.
Mabilis na tatalikod at magkukubli
sa sulok kung saan hindi mo siya matatanaw.
Hanggang sa tuluyang lumayo; na para bang natapos na
ang kumustahan, yakapan at masasayang kuwentuhan—
bago pa siya mapagbuksan.

Kasing-sigla ng mga tangkay na muling dinalaw ng hamog,
kaytagal kong pinanabikan ang ganito ka-pribadong mga tinig.
Magaan ang dibdib, pinakikinggan ko at minamasdan
ang mga pagyakap, pagbulong at paglambitin
ng mga dahong naglalambing.

Sa susunod, maingat akong lalapit.
Tulad ng sinag ng papasikat na araw
na humahaplos sa tarangkahan—
tahimik

uulinigin ko ang bawa’t tinig.



--------------------------
17 February 2010
Oran, Algeria