Saturday, 15 November 2014

Hacienda Luisita*



Bandang tawli, mistula
inangus kang atbu
at melanging sapal
a iniang miyapsa king pitak ning sentral
mamaksing la ring bagun
karing bakal a riles
ning saskup mung salu,
pamalipitan ing balang pisik
dang tabtab ning penatal mung bie.
Ding pasyuk ning silbatu ila naman ding gulisak
ning pamanyalangsang mung
emu man apawaga king angin
a peparalikat ning marayuput a mulasis
at ala lang kakawlan ding pangaku
nune ring bagasung anting puling,
ding sasalingalngal a bawu da ring cualtang
‘e muman durugpa karing kekang palad,
karing palad mung alang gulis
ning kapalarang e byasang menuling at sinawa
king grasa ning pangasayukut at kapagalang
semantalanan.
Meging katawan me
ing imalan mung pipiblasan -
kulurut, mengupas, mangalirang;
makamantsa ing kirut karing balang gabak
dapot king pamitagni-tagni
apipituglung la ring siwang king banwa
ning dalise mung lugud.
Pinande me ing bakal
angga na king maging kasing-kasyas no ning bakal
ding kekang gamat,
mupin, ing para karing kekang palad
kabinutil yang mayumu,
metung ya waring butil a mayumu
ing bakalan nang apunan
ning kekang gunita?
Kakalampag la wari ring makina
ban king panyatang ning kaleldo
ala ka mu mang damdaman
nune ing langitngit da ring mengalawang a bagun
at aklis ning pamanyirut
da ring payung-payungan king atbuanan?
Ing pupul na wari ning kekang kapagalan
mata la mung alang talamsik
ning mibabayang asetilin,
labi la waring makatikum, e apasyag
ing lagyu at sikanan na ning uri?
Kabinutil a mayumu
king kekang palad,
asne kabusilak, pablasang ding gamat mu
ila ring mirinatan. Sakmalan me
ing kabinutil a iyan karing manimawas
mung palad, itikum la ring mapupuput
a taliri, ing kamau mung
tabas at aske na ning yatung makakabat.
Keka yang aninagan, sumangid
ning kakaul a dulum,
ing metung a panaung
e na dapat pang ipagpabukas –
katindi na sapuk ning aldo,
makasilo la ring taram da ring layit,
agnan-agnan ing lagapak
da ring atbu king kaparangan:
Kekatamu!
makapangaklak la ring makina,
susulak ing bubukal
a pulut king maragul a kawa,
mamakbung ya ing asung
king kaban-kaban a butil
ning kekatamung pangaduhagi:
Kekatamu!
ing talsik ning daya
metingkad a tina
ning kasalesayang ding kauri mu
ila ring mekipamuk.
Mamapi king kanwan mu
ing pibuklud a kayalipinan
At king kalabkab ning tauling pangisnawa
karin magsamulang talete
ing titis ning tagumpe.



---------------

*
-taganang misulat king Tagalog (Gelacio Guillermo)
-milikas king Kapampangan (Oliver S. Carlos)

Pauaga: Ing mesabing poesya ala ya pung aktwal a pamagat nune metung ya karing metipun a poesyang sinulat at pepalimbag na bilang aklat ning poetang Gelacio Guillermo at inampang na karing talapagobra ning Hacienda Luisita. "Hacienda Luisita- Mga Tula" ya pu ing pamagat ning mesabing aklat.