Patikdon de ring laureadu
ing kalalangan at amanu
Maglitanya la ring dila:
Indu! Indu! Mibangun ko pu! —
màsakit ya iti
at e na akua mang makabulad.
Ulwan de at sasagipan
payasukan
karing mamerang galal
makarimang pamanyamsam
at miyayaliwang kabalbalan.
Ing lugud
makanyan yang mipipildis kabaldugan.
E ku na pagtakan. E ta na pagtakan.
E na dapat pagmulalan
nu nukarin papunta ing pamanyayang
karing nanumang mitatagan a sikanan--
kamatayan! kamatayan!
Ala yang keliwan
king pirapal, alang patugut a tulandung
at pamikuldas ning danum—
ibat king kalbung kabundukan, gagapang
at milulumud king gabun ning kapatagan
agyang maluat nang tinuknang ing uran
Ala yang keliwan
king lablab ning api keng karelang pagkeran
a era atakasan— kakaluku dapot e magigisan
ing titis a baya
at lipatung tatalsik,
kikislap a patutu
ning karelang kamalyan--
luluklukan do reti
at e ro buring lakwan.
Lipang-lipang a pamaninap
libutad ning kaugtuan.
Wednesday, September 29, 2010
King Ume Mate At Karing Makamate
Subscribe to:
Post Comments (Atom)
1 comment:
Pepabasa me kareng mamuting-muting a lawun isip ine? Ila reng makamate keng amanu, kaibat ila reng tatarenten a magmius a mamamate ne kanu ing amanu uli'ng deng anak kanu e ra ne balu ing amanu, ngeni pilit dong pipinpin ampong lalabanan deng anak a susulat ampong biasang kapampangan, potang kayi tatarenten lang alang patugut deng bolang. Pangatua ra bolang la ngan.
Post a Comment