Sunday, 21 October 2012

Titis


Susulapo na ning angin ing titis a manibat king pitik-pitikan ng sigarilyu. Kabang makalukluk ya king metung a suluk ning panciteria, o nung misan, kabang susulyapan no reng anak a magtuas-tuasan king metung a mula – kabang babalikan no ring mapilang bakas ning kayanakan.

Ing tutu na, liwas karing alang-malit a pamanalukyat karing impun byabas, o ring palingut king balugbug a sasagana nang Darang Maring andat sosopan neng milukas king maputi nang imalan a mengatmung agta ning duat o katas da ring pemulut at pengan nang malulut a mangga kayabe da ring kakyalung na – ala na, at ala ya, nanumang mayulagang bague atatandanan.

Malabug la namang dampul ning milabas a kasibulan ding mayayaninag. Ena ne atandanan ing lupa na ning kapalsinta nang akayabe nang migluklukan kilub na ning kubung megawa king talaib. Den mu pin atang mangalalam a bakas ilang mandatila. Kalupa namo ning mapangangas a palad a gagalugad at mamaplus karing susu kilub na ning maimpis a imalan, ing banglu ning batal, ing kintab ning makabang bwak, ing lambut ning labi at ing kuryenti at mapaling sasal a iyatad da reti king basal a salu -- deni magmarka la king kaisipan. Aliwa reng lupa at aske ning pamikandayu.

Recuerdu no ning milabas deti a balik-balikan ning metung a ginulut at linawut. Miglagalag man ing isip at katawan, makasimpan la wala at mayulaga lang bague magpaganaka nung nuanti na karayu ing keyang disan. Nung nuanti na kalambat ing pangawale. At nung makananu neng lawan ing pangatau’t sarili na. Ninu iya napun? At ninu na iya ngeni?

Mengari yang bayung salta a paniniglawan kareng laun a larawan ing dati nang lugal keti yatu.
Asasalat ne ngeni ing lumbe ning pamagdili-dili karing melapad a kanwan, karing kinulubut a gamat.

O mekad asasalat nya naman ing tula at matipid a timan kabang pagsinuan na nung ninu karening makaletratu ing masungit dapot malingap a dara nang Maring -- ing sinese kaya. Ing darang meging indu at ibpa na. Ing pengakuanan nang ipetisyun at kwanan basta miras ne king Amerika o Australia.

Babalebe kambe ning yumu ing pait karing pisngi. Mayumu la man, akakwa ra palang maging masalpak ding tagumpe iyampang nung emu no darasan ding kekang babalikan.




***
August 2012
Oran, Algeria




Monday, 15 October 2012

ekphrasis





casaup no ning singsing a quiquetan ning ipan

ding matang manaquit quing catutuan

timauang isip

asbuc a alang busal

matibe casangcapan


lasacan ta la ring abtac a pasbul ning maling caisipan






* * *
2012
Oran, Algeria

Friday, 5 October 2012

Mepupus a Timan (Metung a Malikwatas)





bwak lang malulugus ding tawling inawa

tangis no ning lunus ning ume paynawa

punyal lang tataglus king salu ning sinta

deting pangapupus manatad lang dusa

kirut no ning napun, uma no ning uran

libutad ning ambun kaul no ning pampang

salpuk no ning alun king dalan-pasigan

ding lugud a mamun, ding tatauling timan

ding sabla mung bakit, sinese, binilang

akdak a mapait king salu sinimpan

lumbe na ning isip, mepupus a timan

dapat nong iwaglit miyalilan no man


***


Mumunang Kasagsag



bwak lang malulugus

tangis no ning lunus

punyal lang tataglus

deting pangapupus

kirut no ning napun

libutad ning ambun

salpuk no ning alun

ding lugud a mamun

ding sabla mung bakit

akdak a mapait

lumbe na ning isip

dapat nong iwaglit



***



Kadwang Kasagsag



ding tawling inawa

ning ume paynawa

king salu ning sinta

manatad lang dusa

uma no ning uran

kaul no ning pampang

king dalan-pasigan

ding tatauling timan

sinese, binilang

king salu sinimpan

mepupus a timan

miyalilan no man



***

Aliwa pang pamibalasa at pamilibe lugal



ding tawling inawa kirut no ning napun

manatad lang dusa libutad ning ambun

ding lugud a mamun ning ume paynawa

salpuk no ning alun king salu ning sinta

uma no ning uran deting pangapupus

king dalan-pasigan bwak lang malulugus

punyal lang tataglus ding tatauling timan

tangis no ning lunus kaul no ning pampang

akdak a mapait king salu sinimpan

ding sabla mung bakit sinese, binilang

miyalilan no man dapat nong iwaglit

mepupus a timan lumbe na ning isip


****
2012
Oran, Algeria