Friday, 28 October 2011

kalayit

tatalukyan da ka
mag-umasid ku
at matigik manaya
king kaul ning dulum
potang balikan mu ne
ing awang ning milabasan
sitsitan da ka at awsan
kabang babalag me ing kurtina
kanita me asulyapan
ing kakung talukbung
kanita ne arakap
ning kekang mata
ing kikislap kung kalayit
pablasang panayan ku
ing pinandit
a sambitlan ku keka:
oras mo na.



***
2011
Oran, Algeria

Tuesday, 25 October 2011

Asim

Asim
Ng sinigang
Sing-asim ng buhay
Tulirong nanay. Jobless na
Tatay


--
2011
Oran, Algeria

Thursday, 20 October 2011

Babo Ning Bubungan

King karelang pangatalakad
Babo tipak ning batu, dudulung la king dayat
Papalbug da la balang bengi ding karelang sarili
King kekang salu . . . king makaliyad mung salu
Mamamate la ring kabalyeru

Mamamate la
ring Kabalyeru.

Makalubas, daralit ne ing kirut na ning bulan
King gugulisak a tete ning Oktubri
Lawan da ka
Kabang mandilu ka
Balang benging mandilu ka
King malat a danum ning dayat
At karing lagas a talulut ding bulaklak
Kabang mamamate la

Mamamate la ring kabalyeru.

Sisilawan naku ning kislap at kinang.
Ing kekang banglu, manamuyut a salingalngal
Miraras angga keni king bubungan

Kikintab lang pilak
Ding maglukut at magkerang alun
Ding mababalbal dang salpuc
Talulut lang sasalat at mumuma
King malambut a salu
At makinis mung tundun
Mamamate la ring Kabalyeru

Mamamate la
ring kabalyeru.

Tuesday, 18 October 2011

Tumayla Ning Indu

Magtumayla ya’ing pusu
Karing budni nang sapni—
King amanu maglualu
Ban e ya malumpawi


****
Oliver S. Carlos
2011
Oran, Algeria

Saturday, 15 October 2011

Ing Anak a Magaral

Mamesus ing singil da
Tikpan de’ing kakung asbuk
Ing amanu kung mana
Payugse re king ilug



***
2011
Oran, Algeria


Monday, 10 October 2011

Pinoy Cinquain 2

ginto
ang halaga
ng bawa’t kataga
ng makatang ang hinabing
tula
ay pagtutol
sa lider na uhaw
sa pera’t kapangyarihang
nakaw


***

Wednesday, 5 October 2011

Galac (Kapampangan Cinquain*)

Galac
Ning manaya
Nung datang ya’ing sulat
A sasabing magbalic cu
Sinta




----
* Cinquain – maka-sukad a porma ning poesyang linwal at linaganap bilang variation da ring tradisyunal a Haiku, Senryu at Tanka ning bansang Apon, Atin yang 5 linya (ibat king Pranses a katayang cinq a buri nang sabyan 5) at ing sukad na 2-4-6-8-2.

Monday, 3 October 2011

Ing Kakatuk King Pasbul

“ING amanu ya ing kaladwa ning nanu mang lipi.” - Alangpikilanlan

Ing indu mu, nung sakali
larawan ning migbukad
at masamyung sampaga
misan
mibalik ya
king pasbul kalibudtan
ning benging malalam
dimdam mu ing katuk
mangaralas at masikan,
nung tipa ka
nung makibat ka
(bage lilisyan o e mu buring gawan)
dapat me ping piyadyan
tangalan ing kulubut nang lupa --
lupang pilit nang sasalikut
karing timan ning labi nang
milako na kule. Nung datang
ita, mekad maluat
e ka tipa. E mya mu man pakibatan.
Takpan me pang ulun
ing kekang balugbug
atsaka ka magtudturan
(kasi pin ala namang kakatuk,
e wari? ala kang daramdaman)

At kelambatan?
King katatawlian?
Talakad ka king pagkeran
mangatakid at maybug misakab
kabang kakapkapan me
ing pasbul a miyayapsa king bayat
ning susungasub nang katawan
king kekang takde, dulapan mu la
karing lawe nang maratna’t tutulid
ding tumayla nang mengaskad
pelalung pekamalating talindo
kilub ning pangatau na -- ala na.
Ala na kang akapa
king salu nang siswan na
ning mengapalipit mung dila.
Palub me pin at ikera
Salangyan me ing sulu
saka me timalaran at pagsinwan.
Kanita, at karin, asanak mu na
nung nanu ya kabaldugan
ing lugud
ning anak king indu
at nung nanu sana ing agawa na niti
nung pigkalub mya mu
kabang maranun . . .
iniang atiu pa keka
ing panaun at pamikatagun.


****
2011
Oran, Algeria

Saturday, 1 October 2011

Uran



E pa kikislap ing tigkal karing linang
Mangalagad, tunggal-tunggal

ing patak ning uran. Bulak a mangapirasu
ing maglakbe’t tutuling a biga. Mangapitna

at mangapatad—dalumdum ing kaul dang yatad
king magtibabal-matuling at magpaldas

a labuad. Ing linang a makatayangtang,
e kaya mangawit mamatyawan

karing sula-sulapo tulang at talubang--
lipat-lipat at maglambis karing bulaklak

memukadkad at melili busal ning talaiban?
Ah! ring bulaklak—kalupa ku, sabik la naman

king laganas a patak. E ku na alingad
king papaswit a lagaslas ning ilug

ing urang mumuma karing batu, kening pasbul
at lakbangan ning kekatang bakuran…

sasalangi kilub bale

king panangnangan kung nasi ,

king sasabo kung asan …

ing dalise tula ning kekang panyatang.



***
2011
Oran, Algeria