Adwa cang pulung banwa
y acu labi cung lima
iniang sabyan mung:
ing tune lulugud, makanini ... makanita.
Minagtal cang bulung
caring adalanan tang cuayan—
a antimong alipang sisiclod,
magpuri quing gabun
qng balang tsup ning anging banayad,
at saka mo tiru ding macayagpa,
bala mu mibabayatnan nang sanga ning nara—
padugpa no’t sasayad ding malapad nang bulung
a mumuma caring makayusli nang uyat
macatiman ca, antimong anghel
a migbaba ibat banwa, cabang sisipatan
mong tunggal-tunggal ding mala-kristal
a amug caring balang bulung
a teterac
maquiyalung
qng mapalsinta nang pasyuc ning angin
ala cung ayntindyan caring sinabi mu,
pablasang quing balang quibut ning labi mu
carin la macalawe ring mata cu
cabang babatyon mu'la at panayang
matac at mabalag ding amug —
a banayad cucusad, magbaba
pepaybat caring bulung macapababo
padagusgus caring bulung macapalalam
angga na quing manacbag
at mabalbal la caring
manaya mung palad at canwan
adwa cang pulung banwa canita
at adwa nang pulung cauran ing milabas
agaganaca ra ca pa
ala nang aliwa pang sinta
a mipalili ibat canita.
Saturday, February 20, 2010
Gunam-gunam Quing Cauran
Subscribe to:
Post Comments (Atom)
6 comments:
Kapampangan! Ba, wa dakal a dakal a salamat, kaputul. Gawa ka pa. Samalan mu. Luid ya ing Kapampangan! Ampon buri ke ing papatigtig mu keng bilungan (sayt) mu: John Lennon. Imagine. Ba. Dakal la reng e re balu kabaldugan ining tigtig nang John Lennon a ini. Ditak tamu mu, kaputul. Anya siknangan tamu ing lub tamu.
Ing kabalen,
Papa Osmubal
Bro, salamat keng komentu. Madalas ku keng sayt mu at maka-add ka kaku. Sana mu pin adinan mu kung tips keng Kapampangan Lit. Makasulat ku pero kulang kasanayan. Mas masanting nung abalu ku la deng dakal pang sayt a kapampangan ampong Kapampangan poets a pwedeng i-research. Salamat.
O reni reng malyari mung puntalan:
ing eK!:
http://eksite.com/ek.html?1173/2.10.2010.eK!
ampong ing dake kawatasan ning ek:
http://eksite.com/versilog/
atin mu naman ing library of kapampangan poetry:
http://ceramtex.com/poecia/poecia3
Kapa malyari kang sumulat, bro, keng eK! (sanese o essays) ampong Versilog (kawatasan o poetry), ba nung sumulat ka karening aduwang mesabing bilungan (site) a reni, taganang lalu kung masaya, kaybat itayid mu la o ipalwal pasibayu keng kekang bilungan (site). Masanting ya ing eK! ampong Versilog, makabusni la isip deng tawu karin, anya aburi me, pante ya ing yatu karin, bro, sumulat ka karin.
dakal a dakal salamat. paburen mu, bro, magtry kung magpasa mapilan at inumpisa ku na lang basan deng site a binie mu. hmmmm...abalu daka tuluy tune lagyu. great sites at great contributions from you... salamat.
Salamat, bro. Wa, pane kang memiye sanese (essays), kawatasan (poems), ampong nanu pang mayayawus pamisulat malyari reng palwal deng kabalen keng eK. Masanting ya ing eK, makabusni la isip deng manibala kanita, kalupa tala isip, anya aburi ro reng susulat mu reta. Sige, bro. Pandalasan mung susulat keng eK. Buri ra pin deng kabalen karin pane lang mamiye reng talasulat da. Pakarakal mu la.
Ba, kapa, bro. Ing Lei Man Lok, lagyu ne ning anak kung babayi. Eke lagyu. Ing Papa Osmubal yang lagyu kung talasulat, itang ikit mu pin keng eK ya ing taganang lagyu ku. E mu na panyabyan.
Post a Comment