Dapithapon at Umaga ng Matagalang Pakikibaka

Sa dapithapon ng buhay
may mga pagal na katawan
na nais na sanang magpahinga.
Makaamot man lang ng katiwasayan
ng isipang ginigiyagis ng pangamba…
ng takot na malugmok sa kasukalan;
doon sa dawag ng gubat na inaring ina
at nagkanlong sa mga tulad nila
na may di-pagagaping diwa.
Sa dawag ng gubat na di kailanman
nagkait ng kanlungan at aruga
sa mahabang taon ng pagdurusa,
sa mapait nilang pagkawalay
sanhi ng pakikibaka.

Kung maari lang sana…
sa dapithapon ng buhay niya
ay nais na niyang magpahinga
Humabi na lamang ng mga kwento
ng magiting nyang pagtindig at pakikibaka
sa kalayaang pinagbuwisan ng maraming buhay
na tigib pa rin ng pag-asa niyang tinatanaw..

Ngunit magpapatuloy siya.
Maging sa dapithapon ng buhay niya…
magpapatuloy sya.
Abutin man ng takip silim.
Tuluyan mang malugmok sa karimlan ng gabi.
doon sa kasukalan na sa kanya’y tumanggap.
Duon siya nabibilang.
Doon siya nakatagpo ng kapahingahan.
Doon sya maghahanap at maghihintay …
ng pagsikat ng isang bukang-liwayway

Hindi na para sa kanya kundi sa mga susunod pa.
Sapat nang matanaw nya ang pamamaalam ng dilim.
na ibinabadya ng mga pag-aalsa ng lunsod…
At kasabay ng pahimakas ng katawang-lupa
Nakangiti siyang lilisan na tinatanaw
ang pagsilay ng isang bagong umaga
dala ang pangako ng isang bukas na malaya…
Dahil batid nya… may papanhik sa kasukalang iyon
upang damputin ang baril nya.
May bagong sibol na bayaning titindig at papalit sa kanya
Sisigaw para sa paglaya.