Kauran

Isukub mu ku king kekang payung.

Penandit, balabalan ta la
ring kekatang sarili
karing dirimlang alino

Ding tula ning kagatpanapunan,
ing anggang bage iyampang
ning painggulut a kaleldo
penandit namu, mawala na ngan.

Daramdaman ku na la ring lagutuk
ning pangabislak da ring impun --
mibabagsak karing batu, king gabun,
karing mangasipit a mangalating tanaman
a menintun karinan at santungan
karing mibablas berding mulahan

Daramdaman ku na --
ing anggang kaplas ning kauran,
king salu ku, mibabalik ngan:
kasnuk, takut, pamag-inayang.

Miwale, kalupa ning aslag
a kinaul at selikut ning silim,
marurunut yang anting abu
ing kakung kaladua.
Mangalgal ku
kabang pakiramdaman ku la
ring lalagapak a impun;
ding makaklak dang kaksing
barug la wari king tambul
a manatad taung-makagapus
king kayang pibarilan

Ing kakung kaisipan, matbud ya waring kubul
a barug-barugan nang alang patna ning angin at uran.
Makalale kung mangipuspus; at king pangapuput,
ing kabug ning salu ku, ala yang keliwan
king baintaung sisinsil at mipapakat
king tatauling palitada ning lapida . . .
para kaninu? – mayaslag ya at mipnung pali
ing kaleldo --- kanita,
dapot ngeni kauran na.
Siklut-siklutan no ning angin
ding lumbe siuala
ning pamanlako’t pangawala.



***
2011
Oran, Algeria