(pamiganaka kang Thich Quang Duc)
Oliver S. Carlos
… ing sagitsit ning balat
kukulurut
malalanat
papalto king laman
a makalale mayayagnas
… ding sukal a lub a emu sukat—
pepasiag da ring paka-tas
at masisilab a gamat
… ding bitis mung
milalakwan bakas
ning abu at bau
ning gasolinang
tigtug mu king kekang katawan
eku no sana panamdaman
balikdan
o basibasang sulyap mu man
nung e’ku mitubuanang
lugud at masabal
king kakung balayan.
No comments:
Post a Comment