matarling ya siuala ing matuang lalaking gaganap a bida
king metung a piyalben dikil keng temang pamisalba
king mamamate amanu, kalalangan at literatura—
king malamyus nang pamigale king kudta nang poema,
ing sabi na:
gusal ta na! guniat ta na! itamu ngan, kimut ta na!
ban e mate ing amanung kekatamu pepamana
meko keni kayanakan, ikayu mu ing pag-asa
ikudta yo at igale ding poesya yung makarima
dinan yo ke karing bayu’t mangasanting yung ideya
alang ketunan-tunan, linapit ya ing metung a kayanakan.
ala yang nanumang sinabi...
misdan la at metigalgal ding e makapanwalang malda
iniang begut ne king pangatakas ing baril a sasalikut na
atsaka ne berilan a buntuk ing mipase matua…
oyan ing kalalangan! oyan ing literatura!
papalakpak la at mag-viva
ding mekayalbe at dinamdam
king mesabing drama.
******
2011
Oran, Algeria
Sunday, February 13, 2011
Babo Entabladu
Subscribe to:
Post Comments (Atom)
5 comments:
*** Komentu ibat kang Carolina Sicat Guanzon
Cang Oliver,
Balic-balican queng binasa ing macuyad mung casulatan. Pilit queng paqui-intindian. Binusisi cung metung-metung deng linea. Drama ya? Poesia ya? Tagulele ya? Pamanumbat ya? Masiadu yang malauac a cabaldugan. E que atabiling agad-agad. Pilit yang taid-taid qng isip cu. Ating casulatang malaguang intindian. Malaguang basan. Malaguang lacuan. Malaguang calinguan. Ating poesiang magtumaila qng pusu. Ating basultu. Ating maglubas idea. Ating managcas. Ating macatula, macayama.
Dapot ining macuyad mung casulatan, Cang Oliver, lingasngasan nacu. "Nanu ya?" ngaco. Inutus nacung maglalaue queng casalucuyang maliliari. Maquirandam mataimtim. Misip, misip, misip! "Obat...Obat...Obat...!" ngaco caibat queng binasang mecatatlu ing sinulat mu. Malapad ya uniat. Dacal ya sasaclon. E yamu cudta, drama, poesia, o nanu man. Masaquit queng itabili o calinguan. Nanu ya? Dacal a salamat dinaque me careng talabasa.
Lulugud,
Carolina Sicat Guanzon
Atsing Carol,
Munang dili, dakal pung salamat keng oras a inukul para king kakung lalang.
Dikil king kutang (wa man at balu ku pung ing kutang yu kutang ne ning metung a intelihenting tau a manayang pakibat e para king kayang sarili nune para king kamalinawan da reng aliwang talabasa) nung ing misulat drama ya? poesia ya? tagulele ya? pamanumbat ya? – pablasang ing tema metung yang magnaknak a sugat a masakit salatan, (dakal no pung masyadung menasakit at mekapanasakit keng pisasabyang ini) buri ke pung lakwan karing talabasa nung makananu reng dapat lawan ing misulat. Ing sangkan, imbut kung ing lalang manatili yang palaisipan at amanung malakwan dependi nung nanu ya katatalakaran at panlalawe ing mamasa dikil kaniti. Maniwala kung king metung a lalang (in a poem to be exact) dapat lang taglayan ding atlu nang kayadwanan o rekisitu: imahe, retorika at anyu. bukud kaniti, e ya mu dapat malalam nune malawak ya dapat saklo at buring sabyan at makabuklat ya, mengaring mepintang larauan keng canvass, king miyayaliwang anggulu ning interpretasyun. Ing poema kapilan man e dapat itulad king metung a repolyung tenam mu at siklubang bikan para iyubug me mu agpang keng buri mung anyu. Keng matulid a pangasabi, ing poema malaya ya.
Pilan pulung banua da ne pung tatalakayan at pipagdiskusyunan nung kapilan tamu aturing na ing metung a prosa meyari ne king kayang panga-prosa at lulub ne bilang metung a poema? o kapilan tamu dapat sabyang ing metung a talasulat eyamu bukud megkuwentu nune memoesya ya naman? siguru, makanyan keng lakwan ing amanu ku at nasa kung maging metung ya sanang punto- de-diskusyun ing lalang nung nokarin ya ing angganan ning prosa at nokarin ya magsamula ing poema.
Dakal pung salamat, Atsing Carol.
*** from Papa Osmubal
Bro,
Palakpakan! Makanini ya pin ing kalalangan-- matapang ya, paisipan naka, dinan nakang amanu't kareng gulut da reng amanu dakal lang katakatang kabaldugan. Eksistensiyal ya datang-- oreni reng makabayung siwala. E re man aburi reng matwa ini, kasi akakit dang atin yang marok a milyari anya lawan de mu keng amanu-- e keng kabaldugan.
Sulung,
ing kaputul,
oca (papa osmubal)
*** from PL Artdax
Atsing Carolina,
Ing buri na pung sabyan nini, papalwal nang Oliver keng sulat na, ding tradisyunal a poesyang miki sucad, miki rima ala lang cuenta ampon e la maka sagip keng amanung mamamate. Keng isip na yang gaganap keng papel ning kayanacan a mekamate ketang tutunggen nang (matwa) makalumang estilu. Deng pung manalbe (audience) ila pin ding maldang Kapampangan a keng isip nang Oliver mas capad da ing estilung malayang sucad, malayang bersu. Metung cusing mu pung municala cu.
lulugud,
artDax
from Carolina Sicat Guanzon
***
Cang artDax,
Dacal pung salamat qng pamalino yu. Metung ya pung perlas
ing apulut cu quecayu. Dapot siguru pu dacal ya perlas binubud
y Cang Oliver quening cayang macuyad a casulatan. Qng pung
mabusisi cung pamanieme careng linea ning cudta, cabuslu la
pung perlas deng besibas nang Cang Oliver.
Cang artDax, nung casalanan pu ing masiadung mabusisi,
micasala cu pu. Sana pu apanupaya yu nung sisimen cula
balang linea na ning cudtang babasan cu. Pasibayu pu,
dacal a salamat. Melapad cu pamanintindi qng casulatan
nang Cang Oliver.
Lulugud,
Atsing Carolina
Post a Comment