Ing Laun a Sarul

ING LAWUN A SARUL
(Oliver S. Carlos)


Ala nang aliwa pang mipaparsalanan king pamagtikum ning gabun
nune ing kayang pangalawun. Kabang detang kayagna’ nang mesali,
kuwentu nala mung mekalingwan king minurung-sulung a pupul
ning dayatan at kalanan, o ning pasaldak a pamagpaynawa rang
mibalabalang kalawang, malaus ya, king manene nang pamanyugat
at pamangili king salu ning asikan. At kabang iti gagawan na,
sisitsit na ing asasaganan nang mangasyas a buliga’t bikual,
ing papayungan nang pali at pandilung uran a iyatad ning bigang
magunyat king panyatang ning mumunang sala. Ena no alingad
karing payid-payid nang galaid ing saingsing ning kapagalan,
karing balang pamandalakit na’t pamisadsad king gagambulan nang
kuwadradong sukad, ding pugak-pugak a pintig at ritmikadung lagutuk
ning pudpud nang taram a layung mangawani keya king dutung a pitalnanan.
Makananu na pin namang isangkan ning ortelanu king manayang gabun
a mepudpud ne ing kayang taram? Nung inia mangapilitan yang libangan na nya mu
ing gugulyut a damulag karing tikling at kanugtug a sasake at magkanta king
keyang gulut at buntuk. O makananu nang gawan ing ipanibala ne king tudtud
ing uyab at antuk ning mangaynipan a pamanenaya na ning damulag, nung migising
yang makakawani ne ing taram king dutung a pitalnanan at apansingan nang kakalbitan na nya mu at pamatulan ning tutulung uran. Ing pangalaun ning sarul ‘yang suwatan na at katmuang kasalanan. Ating gamat a magnasang ituglung ne ing dutung a pitalnanan king mapagal a bakal, at karin, mayakit ing makabalut a kkalawang. Ding pilapil at tarundun a makasaksi king malilyari, isambitla ra namu ing karelang mua karing makuyad a pamagkuswelu, karing palmura at opinyun nung nuanti yamu kamura ing segunda-manung bakal. Ing mipapakarine ortelanu iyang manyawad kapanupayan. Dapot aliwa ing sarul a kalawangnan at mapagal. At lalam ning impung santul, king kayang pangasandal, retiradu ya iting alang aliwang adwan
nune mu ing misan pa. . . misan namu
akwa ne pang asarul ing manayang asikan
bayu re igawad keya ing tawling kayatulan.






******