Wednesday, 15 April 2015

Piraso ning Sulat

Pamilikas ning "Fragment of a Letter," nang Jaroslav Seifert ning Czech Republic.
Timawang pamilikas nang Oliver S. Carlos ning San Luis, Pampanga







Kinabukas ing paspas ning uran
karing awang. E ku mipatudtud
nung inya sinindi ko ring sulu
at saka ku sinulat

Nung makasulapo ya sana ing lugud,
a king tutu na ena naman tagana agawa,
at malyaring king gabun e ne pamu dugpa,

ay! kasampat na sa ning mibalut king tsup na.

Dapot, kayanti na ning kambubuyug a mimimwa
dadalusung la ring mapangalalung uma
pasubsub-bulusuk king yumung katawan na ning sinta
at ing e mipaindatung palad, oyta nang darakma
king nanu at sanu mang ayabut na,
at aping e apatda ing gagapang a pamagnasa.

E magdalang sindak
kaul o akbe naman ning pangamate
king busal at yugtu na niting makamurit a tagumpe.

Ninu mo wari ing makatantya
nung makananu yang lulub ing lugud
karing paris ning takdeng misusukul karing kaul!

Pane kong payatad king patipating
karteru ding sulat ku karing babai.
Malinis ku pilubluban.
Deti, e ko penibala kapilan man
agyang karing sibad o timpapalis mu man.

Lalam na ning kakung panyulat, e no teterak man
ding kawatasan, at kalupa da ring lwang
gilid-gilid karing mata, magsalambitin la, pabalik,
ding kataya. At ngeni king kakung bie, danggut na niti,
dadabewung yang pulayi ning metung a tren.

Makatalakad ku
lele awang ning metung a caruaji
at alisus a mibabalik king aldoldo
ing napun-milabasan a mekipagtipan
karing makutim a biga ning pamangulila.
Nung minsan e ku ayagwantang e kapkap
king prenung makaparikil karing e piyadian

Mekad, pasibayu ko pang asulyapan
ding mangayumu nang timan
a meyagtal antimong sampaga
karing pilik ning melamlam nang mata.
Mekad, mipaimbursan ku pa mu ring
iyatad ya karing makanyan a mata
ing metung ku mumang uma, bayu no pa samsaman,
kanaku, ning dalumdum ding mayumu nang timan.

Mekad, alawe ko pang maratna
ding mangalati nang sakung
a metabas kayanti da ring iyas
a pepaybat king mapaling kalambutan,
ban king pamagnasa, pasibayu ku pang mangasanipan.

Nanu pa waring king tau mitatagan a sukat na nang lakwan
kabang ing e apigil a tren awyan na at daratang
king Istasyon ning Lethe
a mengatmu karing sampagang gamun a makatanam
at mipalibutang pabanglu - a maralas maging sangkan -
bang kalingwan ing segana-gana. Kayabe ne ing lugud ning tau.

‘Yan ang tawling pamituknang:
ing tren, e ne makakusad kapilan man.

No comments: