Nanung parusa ing makasalikut karing lalalan kung gunam
nung deti bubuktut la at manganak alang tuknang --
Nuanti la man kayubu, makananu la man kalagu, sisiklod ya
king bayat ing migaganakang isip, balang deti daratang la.
Lumbe lang alala ning laun a dalan a agaganaka – paulit-ulit
tinanggi ya man ing isip, ding laun a recuerdu ning tula at yumu,
menatili la -- kekata. Dapot deti, angga man ngeni, kakapkapan ta la
pablasang mibayit la ibat karing sugat a migpeklat, karing pait
a akasanayan ta nang isimpan king salu ning metung at metung.
Ding pait a reti, pilit ta la mang kakalagan . . . paygapus kata naman.
Migkera ka king salu ku a tinuring mung pugad. At keni, migsumiksik
at memaluktut kang balamu mabasang ayup; agyang e mu man atitiyak
nung bisa ku . . . nung iti yang dapat. Yaku mismu ing mababalbal karing
malalam at saldak mung singap a tutusuk kabang makasubsub ka
kening salu, Mabayat man, aluguran ku na ing anti kaniting pakiramdaman
ning migagapus king beyatan at kaligaligan. Ing tutu, tatakut kung
king kanakung pangagapus, e ku ne akua pang akilala ing aske ning kalayan.
Ikadkad mu no sana ring kekang pakpak, sulapo na ka. . .
palawut . . . palawut . . . makisabi kung mayap.
Thursday, January 20, 2011
Ding Lalalan Kung Gunam
Subscribe to:
Post Comments (Atom)
1 comment:
romantico ia datang ini, dapuat maplas iang calupa ning metung a sugat. macabaiung paniulat, tunggal ditac iang lalto queng capampangan, macanian man dugung pinimpin cu ne ing sarili cu't e cu na aiam-iam ing maquiduang at mampang at abala cu quening gagauan cu't mecad e man dugu queng quecatamung amanu. macuiad ia ing bie at guisanan cu ne ining mitatagan cu pang ditac a panaun quening pamaniulat cu't macalungcut man quen dugung baniagang amanu. masaia cu't atin cung acaquit pipilan a e paiculung at paiasag queng cacuracutan at capamiraitnan a mimiral queng capampangan.
Post a Comment