munag-sumala

misalbag lang mengaring bula
ring dinatang king labuad

ning kawatasan

iniang digpa yang mitmung dingal
ing metung a alino— libutad
ning kayalan

iniang ing dinugpa atin yang kayabe mikakalukung
alikabuk a ginogo ning anging giligit a maniupan

iniang ala
metung man karing pantas
ing mekakilala, ing kinilala
king kawatasang piglaju na ning lawe—
maratna at mangataram
ning dinugpang balawe—
e re kalupa sasambitlan
e re kawangis pamanapse

dinatang ya ing kawatasan

kayagnan ning makayagpang gamat
ning makayumang a kamatayan
ning panabilin at tauling pamun ning makapase, makarate,
ume mate, pauli ning alang patugut a guliak at lipakpak
ning matikdi, bayu-pakpak a talibatab—
migising

king pamikurap-kurap ning bulan

bulan, a pupulingan na’t bubulagan ning paldas a bigang
dusuldit daralan king kayang arapan

angga king ala neng apikudta metung mang kawatasan
ing melanging labuad

malakwan ya ing balawe
malakwan ya king balawe
ing kawatasan

magdili-dili
mayupaya at mitmung sikanan

dispersal

Akakit ku
babalasbas do ring truncheon
karing katawang mipapase
tatalakad
pasibayung mipapase

Akakit ku
sisikwat do’t wawasiwas
ding kalasag—
susungalngal do karing asbuk
king lagyu ning kapayapan

Akakit ku! Akakit ku!
tutulari
sasagitsit
ing daya rang
emu ayamyam ipagmulmul
bayu ra pa idura king matuling a danum.

At kabang iyatad na
ning mamagus a kanal
patiyanud king imburnal
ing dayang kukulam—akakit ku

singap-singap yang malulumud
ing kekatamung katimawan.

paquibat at pamipalino

Nanu ing sangcan o ba’t maglacbe ca?
Ing dimla quing silid e cu na apibata

Nanu ing sangcan o ba’t maglacbe ca?
Yang masampat gawan. At quing bie cu sadya cung
gagawan, caring balang dulum at aslag a daratang

Nanung susulud mu?
Cupas a maung, matuling a t’shirt, matuling a baseball cap,
matuling a medyas

Nanung susulud mu?
Ala. Agyang nanu ala.
Balabal nia ning aclis quing isip cung magcasaquit.

Ninu ing casiping mu qng tudturan?
Caracal da. Acasuyu. Acayalung. Balang bengi.

Ninu ing casiping mu qng tudturan?
Saldac a pangisnawa.
At ing alang anggang ala. Ibat pa quing pasimula.

O bat miglaram ca cacu?
Canita pa sasabian cu ngan ing tutu. Yta ing sabla cung balu.

O bat miglaram ca cacu?
Uling ing catutuan, calaraman mu naman.
At dalise cung liguran ing catutuan.

O ba’t lalaut ca?
Ala nang ulaga pa ing sabla— para canacu.

O bat lalaut ca?
E cu balu.
Buung bie cu, e cu abalu.

Angga cu capilan manenaya queca?
Mapagal nacu. Bisa na cung magquera.

Ica, mapagal na ca?
Wa. Mapagal na cu. Bisa na cung magquera.
Matudtud cabang-caba.

matbud a talikala

mi-adornuang talulut ning mabanglung rosas,
ali, e ke swatan, pag-inakitan o panagkasan mu man--

ing makapaluput a talikalang ini karing gamat ku’t batal
e ne apingas ing pangatau ku’t dangal, kapilan man
e ku ituring ing sarili kung metung a alipan
a e mirinang ditak mu mang dangalan.

ing martinis a daralit, kilub ning awla nang misapinan,
mipalibutan, karing laurel a pina-pinandit nang tutuktukan,
e ke wari milulupa kabilyan?

pait wari at e yumu ing kayang panamdaman
king lusuk a kalumbayang pepasari
ning migapus at mikulung nang kapalsintan?

lele ding sampagang mamatna king ardin ning tula,
makatuknang la karin, iyagkas no karin,
ding dalit ning kekeng lugud.
at king lamyus ning malugud nang pamigale,
ngening bengi, pasibayu keng pataran
ing matbud a talikala
ning bawal a kapagnasan.

panas queng igu

Tatatap na ning indu ing abyas nang kipkupan.
Dacal pa carin. Mababalag, masasayang
madadamusac qng kiskisan.

Mipapayid, nga ranang talacad
nga ranang sakinda ding panas a malutu—
misasaglulu lang macalual qng igu.

Tutu, y la man maranup la
dapot lilisyan da ing bagsac na ning lua
ning indung balisa at mipapagaga.

Tatap ning salu . . .
cayagnan ning tatap
quing abyas a mumu.

Nu yapa mayntung panyuglung?
Bawal nang mangupkup carin qng kiskisan.
Ing bie mag-hikahus bawal neng suglungan.

Ding panas, e ra man sasaryan
ing pamamirapal,
anti la mong makitangis;
anti la mong maki-simpatya

qng balang tatap a balisa

caring saldac a pangisnawa.