Ing Casalang

Matuling iang tulus ing caiang caianacan—
macabaiutuc
mialunan
qng cadaiat-malatan
labas-labasa’t balic-balican ning aslag ning caugtuan.

Mengalasac no ngan
ding babatiauan nang pampang
quing alang patugut a gulisac ning duldul
at caring maplas a tampaling ning bubulus a uran
ala . . . ala nang mitagan
caring bunga ning saculan a timna’ na’t pipagalan

at caring pala, sarul-gamat at piruya nang tatalanan,
ngening ing isip na’t sicanan icua na nang quesiliman,
ing saculan ning paninap babalican ne’t gagambulan
pasibaiu nong tatanam ding limbug a taguimpan
guilid ding mangalalam a paligui ning dine’t capagsisian
a maguing cutcutang tatanguisan na’t pagpaldasan,
sisilipan, caring alac a alducan at copitang pamalbalan

Ing pipiling a lunus -- ia cabud manaquit qng catutuan,
ing sasalangsang . . .o mecad, caiabe nang maniambitan
a pasibaiu lang musbung at saguiwa
ring lanat a tangque ning caiang taguimpan
caiabe nang manigapu, a misan ia pang calunusan
ing caladuang linubas na’t delise
ning maplas a lisyun ning napun a mesaiang

--calungcutan—oh! calungcutan—gamat ne ning panaun
a sasamsam at guiguisan – macapampan a casalang--
quing bie nang mamirapal quing cutcutan

tulus iang tutusuc quing daraiang pilubluban

Genesis 22:2

king bunduk ning Gerizim – makatuklu king Moriah-
karin ya minukyat ban silaba’ neng
anting mabanglung daun
ing anak nang bugtung—
tatangi at pakamalan—
binie na na kaya
o ba’t ngeni, pasibayu neng kukunan?

Wa, kaniting pinandit
nung kitnan ne man
ning malak-malak nang anak
nung bakit dapat na iting gawan,
linubas na na ning mamintung Ibpa
ing anggang kapikakunuan
pablasang balu na
karing maki-matibe kasalpantayanan
malalaso ngan ing anggang kutang;
alang dapat mitas kayagna’ ning pataram
nune ring pakumbabang dalit:
Y Ka mu O’ Diyos, Y Ka kabud ing dapat kung tukyan!

pablasang gagap na
ding maki-dalise pilubluban
yla ring manakit karing pawaga ning Miglalang:--

aliwa mu reng Isaac
ing buri nang tanggapan;
deta mu namang mengalili
karing liku-likung dalan.
ban abitasa rang
ing tupang pelit nang Abraham
‘ya naman ing korderong
mipaku
minaku
king sala ning sikluban





****published in emanilapoetry

Pamanlipat

mayayaninag ya
karing katas-katawang miyayanib,
karing balang sikdu, kimbe at indayug
da ring miyuyugpungang awakan
ing pami-paitas ruruk
a pagnasan tang puntan

babagsen te ing kaganapan;
aplus-aplusan ing kaselanan
ning alingapngap at nasa--
ning pamanlaut
king mangisnawang gabun

mangulabe ka ta
king galgal ning yatu
balu ta la man ding makasawan
a yuyu ning alun,
ding gaspang da ring batu
king kangatbang pampang,
manalangin kata pa muring
atabnuan te ing ligaya—
kagatpanapunang makawangis
king paraisung miyalunan.



*** also published in ek!/versilog

Ding Mitalakad Karing Kubul

Likwan da la ring mamartikulad ding bale rang tuknangan.
Karing pilapil at tarundun-- a angganan ning pisasabyan--
telakad da la ring kubul ning saingsing at katuliran.
Linucluc la’t nginulangul--anti ra mong paglamayan
ing makapase atbu a pilan-pulung banwa rang tenam
king mengabtak a asikan

alang mayumu . . .
daya
ing kinatas a upa ning sabla rang kapagalan

Ding melakwan a pibale-bale
taguimpan lang meguing bula
lugu-lugung tatakbang
payuli king kawakasan

Mengaring pamanuli
ning dinaung-panaun,
ning sikanang inampang,
a mibata king labul ning angin at bulus ning uran,
mipnu mang pag-inakit, mekad,
taganang makanyan, babalik ngan ing sabla
king sepupunan ning gabun a pibatan

Lawan mu la, oh! kakung balayan!
nung makananung tatanggapan de ngeni
ing karelang pangalupig. Payapa la pilubluban
ding ortelanung meguisan na sikanan.
E no bisang gulisak man!

Lawan mu la, oh! kakung balayan
nung makananung adwang gamat,
mitmung tula nong babalik king matris ning gabun
ding anak nang mengapirat a katawan—
busbus a salu keni
buntuk a sinilip ning punglu keta
butul a linual king bitis karin…

Anting angin a sinawa nang lalabul karing biga ning kabengian,
ding telakad dang kubul, mipapayid at tutuklip lang kapagnasan

lastag at mepata katawan
mengalupig katuliran—

makanyan lang mumuli ding anak a bandi at alipan ning asikan

Karing Lugal A Pitabnuan

minetung neng alduk ning maynip a asbuk
bakasakaling alumud
ing mebangnas a wawa king merimlang kape --


a atlung oras na nang gugogo, saluk-salukan
ning pilak a kutsaritang

melyu na’t melingo
king kayli’t wanang durut ning kapigaganakan.

suswatan ne ning mibubwang lawe ing manaimik a dalig
pikukurus-pigagamus, kukutnan ne ning wanang bitis

ing kayling bitis: datang ya pa kaya?
e na akua mang makabulad ning bitis a kitnan
a magumpisa nang tatakbang - - paluwal.

nung misan, agyan ding lamesang kakabugan
o ring sasaldak at babasibas a luklukan
ala lang abibye kapakibatan

kutang at kutang mu rin
ing daratang

ing malalakwan
karing lugal a pitabnuan.




*****

also published in eK!/versilog

Makisalilung

Daratang ka
karing pinandit a enaku mamasa pa

Kakalawit mu la
king kakung tundun
king kakung awakan
ding makalipang a samu at amuyut
a magbalik karing mumungul a lagaslas
ning danum king dutsang pipandiluan;
karing sikdu ning kasabikang
pilit ku mang sasalikut
king pamiduku't pamipaling
ning lupa kayli't wanan,
bubulalag da rin
ding eratikung pildis
at pihit ning pamikelangan.
Sukal lub
a banayad dang lalasawan ding langitngit
ning kama
ning mangisnawang dalig.

King silid a iti ning sablang panalala
paulit-ulit, iyabut mo kanaku
ding kekang pasalubung:
pengili at pipitna-pitnang pamipalino
maka-lata, kupit-kupit a pamanenaya
maka-boting uma – padaplis, panako, sakildap
makasuput a Comusta na
mamirapal at alang-kasigurwang
mibalik ku keng Sabadu
tingi-tinging lugud a kekang lalakwan
karing kislut-gusut ning ulas a sepinan.

Daratang ka karing balang pinandit
a mapagal nakung manenaya
at kalupa ning sadya,
awni yako—
kakabug a salu
at mangataranta.

metung a dalit

E ye abalanan
ing kamulalung magtudturan

nung makapaluput ya man
king sanga nang santungan.

Paburen yeng manenaya
king atuktuk na at asagpang

Iwangis ya
karing balang silaba ning metung a pikudta

karing iyapse kataya—
banayad dapot kagyat at sakildap;

mamusbus lang panimanman
ding pangil nang mangataram.

Paburen ye, king taimik nang pamaglame.
King matiyaga nang pamanantabe

karing sampat a pamikatagun
ning makamandag a pamanapse.

Nung makananu yeng didinan katimawan
ing pamigulis karing larauan at anyu,

paburen yung pisanmetung na la
ning poesya ku ding tau ampo ring batu

Paburen yu ku.

Gugulis ku—
karit ampong masu—

sandatang pamutut
karing talikalang makapaluput.

despedida

Pikakasaman mu ing pina-pinandit
a busina da ring saken
ing palipat-lipat a indredus
at sitsit da ring siping bale
ing gulisakan da
ring kayanakan a pasulapo buradul
babo ning bubungan

Mabubuluk ne talaga ing yatu—ing paliwanag cu
Mayayagnas ne ing bale tamu – ing pekibat mu
Iniang benging ita
migugulut teng pekirakpan ing tudtud.

Kilbit naku ning galingaldo;
e ku apagsaryan
ing bigla nang pangakayan
ning kama tang pitudturan.

angganan

makatawit keng danggut
susukdan ke ing lapit ampo’ing lawut
ning bie at pangapatlud
keni
libutad ning bunduk—
a magtumayla
makiyagnan karing kurya
ring lalagitik a sanga’t palapa—
teterak
magtiririn
king pasyuk ning amian—
babo ning kayang bumbunan.

titiltil ne king ligaya ing kayang talampakan—
anti ya waring prinsipi —
manuyab ya ing bunduk
karing aplus
uma
pangisnawa
ning dadalise ilug

bengi-bengi
pakiramdaman ku
ing tatangis a lagaslas ning ilug.
kayagnan da ring salpuk ning alun king pampang
a kakung tatalakaran, sasagese ing kirut
sasalangi ing salpak
karing pintig na ning pulsung
mumuling mangayna dapuat makapapangaklak
a langitngit king pasbul. banayad a kaluskus
king banyu
kusina
la mesang pipanganan,

misasaldak la king pagkeran ding pangisnawang
miyuyubug king bilug-bilugan a yasuk
ning sigarilyung makiuma keng kisami—
maglambis at kakaul king yeru ning bubungan.

ala nang ulaga pa ing kirut.

maguing ing nanumang ayampang
a tula ning ilug –nung atin man
agyang ding balang pinandit ning pamipalsintang
misang minaplus at sinalangi king pakuyad kung bie.

ala nang migit a mayulaga
nune ing makasandal king dalig a pamanenaya . . .

mibayit ku king makanining paralan
keni ku makayampang:

king pamamulut karing sampagang mayayagtal
king ardin
ning pamikawani’t kamatayan.

King Ume Mate At Karing Makamate

Patikdon de ring laureadu
ing kalalangan at amanu

Maglitanya la ring dila:
Indu! Indu! Mibangun ko pu! —

màsakit ya iti
at e na akua mang makabulad.

Ulwan de at sasagipan
payasukan
karing mamerang galal
makarimang pamanyamsam
at miyayaliwang kabalbalan.

Ing lugud
makanyan yang mipipildis kabaldugan.
E ku na pagtakan. E ta na pagtakan.

E na dapat pagmulalan
nu nukarin papunta ing pamanyayang
karing nanumang mitatagan a sikanan--
kamatayan! kamatayan!

Ala yang keliwan
king pirapal, alang patugut a tulandung
at pamikuldas ning danum—
ibat king kalbung kabundukan, gagapang
at milulumud king gabun ning kapatagan
agyang maluat nang tinuknang ing uran

Ala yang keliwan
king lablab ning api keng karelang pagkeran
a era atakasan— kakaluku dapot e magigisan

ing titis a baya
at lipatung tatalsik,
kikislap a patutu
ning karelang kamalyan--

luluklukan do reti
at e ro buring lakwan.

Lipang-lipang a pamaninap
libutad ning kaugtuan.

Pinirat A Bulung King Kartograpiya Ning Kataimikan

Ing Pisasabyan magsamula ya
king kalaraman. At ding balang metung
a mamagpang, daramdaman de ing pamikawani
nung makananu yang mikakawani, mapipitna kalibudtan
ing metung a pulu ning yelu – gagato libutad ning kadayat-malatan—

pulu ne ning dimlang antimong alang tataglayan
a nanumang sikanan. Ing kayang kararasan
anti na na waring panibala king upaya ning kalikasan

Ing Kawatasan – makanyan ya naman
kakatmuan deng kalaraman
pilit deng pipiratan at pipitnan
king pisasabyang gagapus da’t babakuran karing batas,
tayidtayidsarisaringkata(k)tala(k)karangmoralpamagbusal. Sala-
salabid a balamu lubid, makatisud a kapanwalan

Dapuat ing Kawatasan
e ya kapilan man Pisasabyan

Mate la’t mikutkut ding Pisasabyan
mako la’t magbalik
ding anggang minagpang
dapuat ing Kawatasan
lalang ya iting katmuan mu mang kalaraman
apirat mu man king papil nang pisulatan
nung makasanib ne’t mamagus,
dumurut ya’t talete mengaring daya
karing uyat at panimanman; pablasang ala . . .

ala yang kikilalanan
a tayidtayidsarisaringkata(k)tala(k)karangmoralpamagbusal,

e ne sakup
ning pamikawani’t kamatayan
ing kalalangan.





***********

ing mangudtang cauatasan

ing mangudtang cauatasan
kuting iang manalucquiat qng platerang sampanan

carin, pilit nong paquiabutan ding macasapunggul
a bulaclac — quilub ning plorerang pilulanan

mililiuas nong cacalauat, macalale
ding bitis na kayli’t uanan

cabang ding makapatauling aduang bitis
macatucud no man

ing mangudtang cauatasan,
tatacut ia ma’t mamiquelangan,

kuting iang magpumilit misampa; ume ia’t ume ia
micalabius ia man, manacbag at dugpa ia man

quing timbang mipnung danum
a macasalud quing lalam.


------------