Ing Mibulang

"When I give food to the poor, they call me a saint. When I ask why they are poor, they call me a communist." – Dom Helder Camara



pemaril de ing migpakan
ing kinupkup, pepatuknang
karing lubas, alang kalma—
alagad ning Mayupaya.
pemaril de ing mengutang
nung nanu mo pin ing sangkan
ating katmu, ating ala
o ba’t ating manalipan—
pemaril de
tagiliran ning pisamban
mengabusbus salu’t kanwan
mali wari ing magnasa
katimawan karing ala?
ela mu man mekunsyensya
pemaril de!



***
Poema king istilung French Rondeau
2012
Oliver S. Carlos
Oran, Algeria

Ding Mig-rali

(Poema king pormang French Rondeau)
-- Oliver S. Carlos


Dekap da la ring mig-rali
Ding tututul istudyanti
E ro buring magprotesta
King matas a matrikula
Binitbit dong anting babi
Gamat, bitis, mengapakli
Alang lunus, alang tangi
Anti la mong terorista
Dekap da la!
Migtaka la king milyari
Ing gewa ra krimen wari?
Ding keng gilid sisimpatya
Pati reta, pemukpuk da!
Katimawan! -- nokarin ya?
(Ot) Dekap da la!