Be Specific (nung manalangin kang Lord)

Makasiklod arapan ning altar
piyagpa ya gamat ing taung manyawad:

“ Diyos ko ala napu nune metung ya mu
ing Kekayu adwan at pagparalumpu
ing sana muktut ne ing kabud babaing
dalise malsinta’t lulugud kanaku”

king pamanuli na disnan ne y misis
selubung na keya susulapo palis
basu, sanduk, boti -- atin ya pang patis
kutsara, tinidur, pinggang maki-pansit…
guguliac, malmura, magwala ya y misis:

I Inday! I Inday!
o yan manyuka ya!
ing sumbung na kaku
I ka kanu ing TaTa!

Ing Tatang a Mag-Nosebleed

TATANG: (kabang panyermunan no reng kayang anak) Manibat ngeni ala kung buring daramdaman mag-english o managalug keti bale! ikayu-kayu mu ing mikakaintindi ! o’t eyu na rugu isipan ikaming Ima yu dadaya ke arung neng daramdaman da kayo at pilit da kayung paki-intindyan? Ing ninumang magparaya arung pasibayu kekaming Ima yu… palwal ke bale at igapus ke ketang kural-damulag…

BUNSU: Tatang, ding tigulele’t simbitla yung mipnung yubu’t sampat a payul dikil king pamagmairing king sisuang amanu, matimyas lang aske ning masabal yung alang kabat, milalu at manyampukaki para kekami at para king kekeng ikasaplala a sukat mie siknangan king pangatau mi’t panga-kapampangan. iti eyu na dapat ipagparalumpu kekami bilang budni yung sapni at pelangga -- uling iti yang sampat at matulid ming gawan—ing gambulan yang alang kapikakunuan ing amanung menan . . . ing amanung kapampangan

TATANG: (… mipamulala ya) lakwas yang mebalangingi.






***
2012
Oran, Algeria

Ing Pane Makatalan

Madre: Nanu ne kasi ing apelyidu mu, iho?

Sakristan: Balu yu ne pu ita, sister, madalas ye pung tatalnan.

Madre: Susmaryosep! . . . Bayag ing apelyido mo?

Sakristan: Sister naman, Rosario pu.

I Berung a Alang Swerti

This is a true to life story....

Bayu la pamung kasal ding miyasawang Berung at Lenlen, manintun ya pang obra ing Berung at alus milalako ne pag-asa uling sinawa neng mikadurut keng Menila e manakit obra na. Misan a aldo, akapagkwento ne ining Tiyong Andoy (bapa nang Lenlen) at I
Apung Basti (apu nang babaing Lenlen):

Tiyong Andoy: O’ Berung komusta na ing pamag-apply mu? Menakit na kang obra kanyan?

Berung: Ala pa pung swerti bapa. Mekapag-apply ku pu keta keng Manila City Hall. Paswelduan daku pu kanu tsa-500 Pesos ing aldo. Eke pu tinggap

Apung Basti: (kabang gogogo na ing pamangan babi) O ‘bat eme tinggap??? sayang neman…nanu waring obra…?

Berung: Pababad de pu itang damulag keng LUNETA…!




***
2012
Oran, Algeria

Ing Kukunan Na

BERUNG: BAPA, kunan ke pu kanu ing kalderu, sabi nang Ima ku.

Bapang BENIG: O Berung, atyu ka pala. Kapilan ka pa dintang. Magaral ka pa?

BERUNG: Nandin pamu pu. Opu, college naku pu.

Bapang BENIG: Nanung kukunan mu.

BERUNG: Ita pung kalderu…




***
2012
Oran, Algeria

Ding Bayung Kasal

Girl: mag-69 kata dear

Boy: makananu ita?

Girl: mayan mu…makanini o…
(atsaka no migpuwestu. oneng mipalatut ya ing girl, 4times)

Boy: Enaku bisa! Eku no ayamyam deng mitatagan pang 65!




***
2012
Oran, Algeria

Atin Ya Pin

Reypist : Miadya ka reypan da ka

Sexy : Ali ka po , atin ku pu!

Reypist : Alang atin atin kaku !!!

Sexy : ay ali , ali po!

Reypist : Taknaydu mo atin ka pin , atin ka naman Ebon kalupa ko Baklaaaa




***
2012
Oran, Algeria

Ing Testigu

Atorni: Ginuong Saksi, nanu ing gagawan mu at nokarin ka inyang milyari ing krimen?

Saksi: Atyu ku pu libutad ning talayban. Tatakla ku pu iniang ikit kung pete re ing biktima…

Atorni: Keng mong bilang mu, mga pilan katakbangan ing laut mu keng lugal ning krimen

Saksi: Bah!, Atorne, atin pu waring tataklang patakbang-takbang!




***
2012
Oran, Algeria

Dadaismo

Atyu naku keng katatawliang bulung ning
aklat ng Yeats. Apat kong aldo binasa
pigbulayan ding kawatasan nang Neruda.
Alang malino
nung nukarin ke akit
ing kabaldugan ning poema.

Bubulung ya ing abe ku bale. Makatodu ya
ing electric fan at sula-sulapo ing papalisan na
mengakalat ing diyaryung pengupit na
ning bunsu ming anam a banua

9 na piso dapat ang i-rollback ng gasolina . . .
Tear-gas ang sagot ng mga pulis habang binubuwag
ang hanay ng mga nagngingitngit na demonstrador
sa Occupy Wall Street movement…
19 na sundalo patay sa pananambang ng MILF . . .
OFW sa Riyadh, ginahasa ng mga Arabo . . .
Pinagdadampot ang mga menor-de-edad
na nagbebenta ng katawan bilang karagdagang kita
sa pamamagitan ng pagtihaya sa ibabaw ng bundok
ng basura sa may Rodriguez Rizal . . .
Walang plano ang gobyernong Aquino na dagdagan ang pondo
para sa edukasyon habang pinag-aaralan na ang pagdaragdag ng badyet
na pambili ng mga armas at helicopter upang tugisin ang mga may pakana
sa malagim na pagkamatay ng mga sundalo. . .
First Gentleman Mike Arroyo atbp. kakasuhan na sa Military Chopper Scam …
Isang lalaki, umakyat at tumalon mula sa tuktok ng Billboard sa EDSA
dahil sa labis na kahirapan . . .

Gewa na kung poema ning bunsu kung anam a banua;
Pepaintindi na kaku karening pengupit at pikalat-kalat na –

mangalalam lang sugat ning yatu at balen kung sinta
ing tune kabaldugan ning poema.





---
2012
Oran, Algeria

Rearview Mirror

Makamasid ya
karing bage at kapalyarian:

Atin tatalsik a butonis
ibat king blusang
ngana nang misara;
ngana nang mibukakâ
ngana nang magwanta
ngana nang mabisâ

Atin laylayang mumukyat
pipigil dapot tutuki
karing hagud at kumpas
da ring gagapang a taliri

Atin pantalung
makalale saskup,
makipagbunu at lalaban
king gagalgal a kalamnan.

Nu ya wari manibatan
ing sikanan na't mahika?
o’t akakua nong pikawani
ding metu pares a mata --

sulyap sulyap, timan-timan,
pagumasdan na ning kayli
ing malilyari kagulutan
kabang ing wanan
makatutuk ne man
king kalsadang tutuntunan

Makamasid ya. Ala kang alaram.

Pasibayu

Makakalat lang kabalbal --
kabang ating akarapat lilisyan ku ing pangasugat karing alala mu

Angga man ngeni, mitatalanan lang gamat, paulit-ulit da kung iyapa ring uma at ayling piniblasan tang burak karing pinitak. Mangapasikdu ya’ing salu balang agaganaka kung, misan, mikakawul katang miragsa karing bubuktut a pale, kabang tuturu kong takbang ding tikad-tikad mung bitis-Menila – king pilapil a ini
a tutugpa king kubu tang pagkanta da ring agus.

Melangi ne ing sapa.
Ala nang manwas at maglinis
karing peklat a mikulapulang burak.

Migit ya pin sigurung malamyus ing busina at indak ning lungsud
kesa king siuala ning amian a lalabul – magpapasyuk karing pipit
kalupa ning sabi mu
kalupa ning tauling sinabi mu

Oreni ring takbang ning pamagdili-dili
a king balang pinandit mikakunu kong umpisan.
King samula, takbang lang mangaralas, kaybat
ing pamikelangan
takbang pagulut
takbang payarap . . .

Tatakpan ne ning makayungyung a sanga ing timan ning aldo.
Nung balu na sana ning makapyak a kubu ing kakatuk a yaslag,
mekad, makatiman neng ibuklat ing kayang pasbul ---
kalupa na namu ning pusung
mibubuklat
tatanggap
king lugud at pangakung
pasibayu
pasibayu
pasibayu nang palakwan.


***
2012
Oran, Algeria

Pamamalbas

Makayarap keng salamin
isipan da ka.

Mete ya ing yamuk
a mipakat king pader.
Menuling ing daya nang
mélangi at migmantsa—

mantsa na wari ning alala
king mepintang kule
ning milabasan tang
milalu keng lambis –
minuli keng pait
at e na miyulit.

Kalwat kung kelingwan—
atin ku palang balbas a dapat pututan;
ating bage sasakmala’t kukuyuman
a dapat nang itabili at pabustan
ating bie . . .
ating bukas
a dapat arapan


Mayan king pakiramdam

ing malale pangaputut

ning bigoti’t balbas—

mababalag at magparayo;

papalsut ning danum-gripu

king busbus ning lababo.





***
2011
Oran, Algeria